Тошкентдаги «Туркистон» саройида Тошкент давлат миллий рақс ва хореография олий мактаби талаба-ёшларининг Соғлом бола йилига бағишланган ҳисобот концерти бўлиб ўтди. Бу ҳақда ЎзА хабар берди.
Ўзбекистон Республикаси Маданият ва спорт ишлари вазирлиги, Алишер Навоий номидаги Ўзбекистон Давлат академик катта театри томонидан ташкил этилган мазкур тадбирда санъат ихлосмандлари, миллий маданият марказлари вакиллари иштирок этди.
Ҳисобот концертда балет спектаклларидан парчалар, миллий ва жаҳон халқлари рақслари ижро этилди.
Таъкидлаш жоиз, рақс санъати билим масканини битирган мутахассислар Ўзбекистондаги ижодий бирлашмалар, концерт ташкилотлари, театр жамоалари, профессионал ансамбллар, болалар мусиқа ва санъат мактабларида меҳнат қилмоқда.
Олий мактаб билан хорижий мамлакатлар ўртасидаги маърифий-ижодий алоқалар тобора кенгайиб, бугунги кунда АҚШ, Германия, Франция, Италия, Жанубий Корея, Хитой, Россия ва бошқа мамлакатларнинг хореография марказлари билан кенг ҳамкорлик йўлга қўйилган.
Тошкент давлат миллий рақс ва хореография олий мактабида билим олаётган ёшлар мамлакат ва бир қатор хорижий давлатларда ўтказилаётган халқаро танловлар, фестивалларда муваффақият қозонмоқда.
Изоҳ (0)