Шимолий Корея АҚШни Кореяни икки қисмга бўладиган қуролсизлантирилган ҳудудда жойлашган Пханмунжом чегара пунктида провокацион ҳаракатлар ножоиз экани ҳақида огоҳлантирди. Бу ҳақда ушбу ҳудуддаги Корея халқ армияси хавфсизлик хизмати вакили баёнот берди, дея хабар тарқатди «ИТАР-ТАСС».
Баёнотда айтилишича, Пханмунжомдаги америкалик ҳарбий хизматчилар Шимолий Корея томонига турли «эълонлар» қилиш учун ҳар хил баҳоналар билан радиокарнайлардан фойдаланмоқда. Улар ҳарбий демаркация чизиғига ҳақоратли хатлар солинган конвертларни ташлаб кетмоқда.
Бундан ташқари, Кореяда 1950—1953 йилларда жанг қилган БМТ давлатлари рамзларига бағишланган кўргазмага америкаликлар Италия, Дания ва Норвегия байроқларини ҳам қўшиб қўйган. «Ваҳоланки, ушбу давлатлар қуролли низоларда иштирок этмаган», — дея норозилик билдирмоқда КХДРдагилар.
КХДР хавфсизлик хизмати вакили демаркация чизиғи яқинида АҚШликлар металлдан қурилган назорат минораси ўрнатгани, ўзлари эса унинг нима мақсадда қурилганига аниқлик киритишдан бош тортаётганини таъкидлади. Вакил АҚШдан ушбу кескин ҳудудда провокацион хатти-ҳаракатларни зудлик билан тугатишни талаб қилиб, бу ердаги «арзимас ҳодиса ҳам ҳалокатли ҳарбий тўқнашувга олиб келиши» ҳақида огоҳлантирди.
Изоҳ (0)