Тошкентда Китоб байрами ўтказилди (фото)

Ўзбекистонда «Адабиётга эътибор – маънавиятга, келажакка эътибор» шиори остида бошланган анъанавий республика Китоб байрами маънавият ва маърифат байрамига айланди. Пойтахтнинг Ғафур Ғулом номидаги маданият ва истироҳат боғида шу муносабат билан тадбир ўтказилди. Бу ҳақда ЎзА хабар берди.

Китоб байрамидан Ўзбекистонда фаолият юритаётган нашриёт ва матбаа корхоналарининг янги китоб маҳсулотлари, нуфузли халқаро китоб кўргазмаларида совринли ўринларни олган асарлар, Соғлом бола йилига бағишланган нашрлар жой олган.

Тадбирда ташкилотчилар томонидан оилавий китоб ўқиш анъаналарини тарғиб қилиш мақсадида боғга ташриф буюрганларга «Болаларда китоб ўқишга меҳр уйғотишда ота-оналарга маслаҳатлар» номли флайерлар тақдим этилди. «Китоб ўқишни ёқтирасизми?» мавзусидаги ижтимоий сўровнома ёшларнинг қизиқиш ва интилишини инобатга олган ҳолда реал ҳаётни акс эттирган, уларни мустақил фикрлаш, ҳаётий позицияларини мустаҳкамлаш, ҳуқуқий саводхонлигини ошириш, касбга йўналтириш, иқтидорини намоён этишга чорлайдиган асарларга эҳтиёж борлигини кўрсатди.

– Таълим ва тарбияни ўзида мужассам этган китобхонлик инсонларнинг билимини юксалтиришга, маънавий камолотига хизмат қилади, – дейди Ўзбекистон халқ шоири Сирожиддин Саййид. – Президент Ислом Каримов «Ўрта асрлар Шарқ алломалари ва мутафаккирларининг тарихий мероси, унинг замонавий цивилизация ривожидаги роли ва аҳамияти» мавзусидаги халқаро конференциянинг очилиш маросимидаги нутқида ўз тарихига, тўпланган тажрибага, дунёда энг катта бойлик саналган интеллектуал салоҳиятга чуқур ҳурмат билан ёндашиш ҳар қандай давлатнинг моддий ва маънавий тараққиёти асоси эканини алоҳида таъкидлади. Демак, китобхонлик анъаналарини янада ривожлантириш, айниқса, ёшлар ўртасида мутолаа маданиятини юксалтириш ўта муҳим вазифа.

Экспозицияга қўйилган «Аловуддин ва унинг чироғи», «Хунук ўрдакча», «Оппоғой ва етти миттивой» каби рангли суратлар билан безалган китоблар эътибор тортади. Ушбу китоблар «Ўзбекистон миллий энциклопедияси» давлат илмий нашриёти томонидан «Инглиз тилини ўрганамиз» рукни остида умумтаълим мактабларининг биринчи ва иккинчи синфлари учун қўшимча адабиёт тарзида чоп этилган.

– Президентимизнинг 2012 йил 10 декабрдаги «Чет тилларни ўрганиш тизимини янада такомиллаштириш чора-тадбирлари тўғрисида»ги қароридан келиб чиқиб, ўтган йили болалар учун бир туркум адабиётлар нашр этдик, – дейди «Ўзбекистон миллий энциклопедияси» давлат илмий нашриёти директори ўринбосари Ҳулкар Алимуҳамедова. – Бу китоблар жаҳонга машҳур эртаклардир. Уларнинг ҳар бир саҳифасида инглиз, ўзбек, рус тилларида эртакнинг қисқартирилган шакли баён этилган ва сюжетга монанд ишланган ажойиб расмлар берилган.

Зулфия номидаги Давлат мукофоти совриндорларининг ижодий учрашувлари, «Китобдан яхши дўст бўлмас», «Одамийлик китобга бўлган эҳтиромдан бошланади», «Китоб – энг яхши совға» каби мавзулардаги интеллектуал викториналарда каттаю кичик фаол иштирок этди.

Байрамда китоб графикаси ва миниатюра жанрида ижод қилаётган ёш рассомларнинг ижодий кўргазмалари уюштирилиб, «Намунавий китоб дўкони» республика кўрик-танлови ғолиблари тақдирланди.

Ғафур Ғулом номидаги маданият ва истироҳат боғи саҳнасида таниқли санъаткорлар, ёш ижрочиларнинг чиқишлари намойиш этилди, ижодкорлар ўртасида мушоиралар ўтказилди.