O‘zbekistonda “Adabiyotga e’tibor – ma’naviyatga, kelajakka e’tibor” shiori ostida boshlangan an’anaviy respublika Kitob bayrami ma’naviyat va ma’rifat bayramiga aylandi. Poytaxtning G‘afur G‘ulom nomidagi madaniyat va istirohat bog‘ida shu munosabat bilan tadbir o‘tkazildi. Bu haqda O‘zA xabar berdi.

Kitob bayramidan O‘zbekistonda faoliyat yuritayotgan nashriyot va matbaa korxonalarining yangi kitob mahsulotlari, nufuzli xalqaro kitob ko‘rgazmalarida sovrinli o‘rinlarni olgan asarlar, Sog‘lom bola yiliga bag‘ishlangan nashrlar joy olgan.

Tadbirda tashkilotchilar tomonidan oilaviy kitob o‘qish an’analarini targ‘ib qilish maqsadida bog‘ga tashrif buyurganlarga “Bolalarda kitob o‘qishga mehr uyg‘otishda ota-onalarga maslahatlar” nomli flayyerlar taqdim etildi. “Kitob o‘qishni yoqtirasizmi?” mavzusidagi ijtimoiy so‘rovnoma yoshlarning qiziqish va intilishini inobatga olgan holda real hayotni aks ettirgan, ularni mustaqil fikrlash, hayotiy pozitsiyalarini mustahkamlash, huquqiy savodxonligini oshirish, kasbga yo‘naltirish, iqtidorini namoyon etishga chorlaydigan asarlarga ehtiyoj borligini ko‘rsatdi.

– Ta’lim va tarbiyani o‘zida mujassam etgan kitobxonlik insonlarning bilimini yuksaltirishga, ma’naviy kamolotiga xizmat qiladi, – deydi O‘zbekiston xalq shoiri Sirojiddin Sayyid. – Prezident Islom Karimov “O‘rta asrlar Sharq allomalari va mutafakkirlarining tarixiy merosi, uning zamonaviy sivilizatsiya rivojidagi roli va ahamiyati” mavzusidagi xalqaro konferensiyaning ochilish marosimidagi nutqida o‘z tarixiga, to‘plangan tajribaga, dunyoda eng katta boylik sanalgan intellektual salohiyatga chuqur hurmat bilan yondashish har qanday davlatning moddiy va ma’naviy taraqqiyoti asosi ekanini alohida ta’kidladi. Demak, kitobxonlik an’analarini yanada rivojlantirish, ayniqsa, yoshlar o‘rtasida mutolaa madaniyatini yuksaltirish o‘ta muhim vazifa.

Ekspozitsiyaga qo‘yilgan “Alovuddin va uning chirog‘i”, “Xunuk o‘rdakcha”, “Oppog‘oy va yetti mittivoy” kabi rangli suratlar bilan bezalgan kitoblar e’tibor tortadi. Ushbu kitoblar “O‘zbekiston milliy ensiklopediyasi” davlat ilmiy nashriyoti tomonidan “Ingliz tilini o‘rganamiz” rukni ostida umumta’lim maktablarining birinchi va ikkinchi sinflari uchun qo‘shimcha adabiyot tarzida chop etilgan.

– Prezidentimizning 2012-yil 10-dekabrdagi “Chet tillarni o‘rganish tizimini yanada takomillashtirish chora-tadbirlari to‘g‘risida”gi qaroridan kelib chiqib, o‘tgan yili bolalar uchun bir turkum adabiyotlar nashr etdik, – deydi “O‘zbekiston milliy ensiklopediyasi” davlat ilmiy nashriyoti direktori o‘rinbosari Hulkar Alimuhamedova. – Bu kitoblar jahonga mashhur ertaklardir. Ularning har bir sahifasida ingliz, o‘zbek, rus tillarida ertakning qisqartirilgan shakli bayon etilgan va syujetga monand ishlangan ajoyib rasmlar berilgan.

Zulfiya nomidagi Davlat mukofoti sovrindorlarining ijodiy uchrashuvlari, “Kitobdan yaxshi do‘st bo‘lmas”, “Odamiylik kitobga bo‘lgan ehtiromdan boshlanadi”, “Kitob – eng yaxshi sovg‘a” kabi mavzulardagi intellektual viktorinalarda kattayu kichik faol ishtirok etdi.

Bayramda kitob grafikasi va miniatyura janrida ijod qilayotgan yosh rassomlarning ijodiy ko‘rgazmalari uyushtirilib, “Namunaviy kitob do‘koni” respublika ko‘rik-tanlovi g‘oliblari taqdirlandi.

G‘afur G‘ulom nomidagi madaniyat va istirohat bog‘i sahnasida taniqli san’atkorlar, yosh ijrochilarning chiqishlari namoyish etildi, ijodkorlar o‘rtasida mushoiralar o‘tkazildi.