Тошкентда давом этаётган спорт гимнастикаси бўйича ўсмирлар ва қизлар ўртасидаги Осиё чемпионатида ўзбекистонликлар Хитойнинг Нанкин шаҳрида бўладиган ўсмирлар ўртасидаги ИИ Олимпия ўйинларига яна битта йўлланмани қўлга киритди. Бу ҳақда ЎзА хабар берди.
Қизлар ўртасидаги мусобақаларнинг жамоавий кўпкураш баҳсларида Турдихон Исломова, Ксения Ким, Вероника Орлова, Линара Сулаймонова, Элвира Юревадан иборат Ўзбекистон қизлар терма жамоаси 154,6 балл тўплаб, учинчи ўринни эгаллади.
Турдихон Исломова шахсий кўпкураш баҳсларида 53,15 балл жамғарган бўлса, Вероника Орлованинг маҳорати 49,65 баллга лойиқ топилди.
Шунингдек, мусобақаларда ўзбекистонликлар билан бирга Япония, Вьетнам, Малайзия, Филиппин ва Қозоғистон каби давлатлардан келган спортчилар жамоавий ва шахсий кўпкураш баҳсларида ғолиблик учун куч синашди.
– Шогирдларим қитъамизнинг нуфузли мусобақасида муносиб иштирок этиб, шоҳсупага кўтарилганидан хурсандман, – дейди қизлар терма жамоаси мураббияси Светлана Кузнецова. – Спортчиларимиз мусобақага жиддий тайёргарлик кўрди. Уларнинг бу муваффақиятида мамлакатда спортни ривожлантириш ва ёшларимизнинг халқаро мусобақаларда иштирок этиши учун барча шароитлар яратилгани муҳим омил бўлди.
Чемпионат баҳслари давом этмоқда.
Изоҳ (0)