Toshkentda davom etayotgan sport gimnastikasi bo‘yicha o‘smirlar va qizlar o‘rtasidagi Osiyo chempionatida o‘zbekistonliklar Xitoyning Nankin shahrida bo‘ladigan o‘smirlar o‘rtasidagi II Olimpiya o‘yinlariga yana bitta yo‘llanmani qo‘lga kiritdi. Bu haqda O‘zA xabar berdi.
Qizlar o‘rtasidagi musobaqalarning jamoaviy ko‘pkurash bahslarida Turdixon Islomova, Kseniya Kim, Veronika Orlova, Linara Sulaymonova, Elvira Yuryevadan iborat O‘zbekiston qizlar terma jamoasi 154,6 ball to‘plab, uchinchi o‘rinni egalladi.
Turdixon Islomova shaxsiy ko‘pkurash bahslarida 53,15 ball jamg‘argan bo‘lsa, Veronika Orlovaning mahorati 49,65 ballga loyiq topildi.
Shuningdek, musobaqalarda o‘zbekistonliklar bilan birga Yaponiya, Vyetnam, Malayziya, Filippin va Qozog‘iston kabi davlatlardan kelgan sportchilar jamoaviy va shaxsiy ko‘pkurash bahslarida g‘oliblik uchun kuch sinashdi.
– Shogirdlarim qit’amizning nufuzli musobaqasida munosib ishtirok etib, shohsupaga ko‘tarilganidan xursandman, – deydi qizlar terma jamoasi murabbiyasi Svetlana Kuznetsova. – Sportchilarimiz musobaqaga jiddiy tayyorgarlik ko‘rdi. Ularning bu muvaffaqiyatida mamlakatda sportni rivojlantirish va yoshlarimizning xalqaro musobaqalarda ishtirok etishi uchun barcha sharoitlar yaratilgani muhim omil bo‘ldi.
Chempionat bahslari davom etmoqda.
Izoh (0)