Ўзбекистон миллий терма жамоаси бош мураббийи Миржалол Қосимов Гонконгга қарши Осиё Кубоги-2015 саралаш ўйинида майдонга тушадиган асосий таркибни эълон қилди. Бу ҳақда ЎФФ матбуоти хизматига асосланиб, Kun.uz хабар бермоқда.
19 ноябрь, сешанба куни футбол бўйича Ўзбекистон миллий терма жамоаси Осиё Кубоги-2015 саралаш «Э» гуруҳи 5-тур учрашувлари доирасида сафарда Гонконг терма жамоасига қарши майдонга тушади. Ўйин Тошкент вақти билан 17:00да бошланади ва ЎзМТРКнинг «Спорт» телеканали орқали жонли эфирда намойиш этилиши режалаштирилган.
Терма жамоа 15 ноябрь куни Осиё Кубоги-2015 саралаши доирасида Вьетнамга қарши майдонга тушиб, 3:0 ҳисобида ғалаба қозонган эди. Ўша ўйин билан таққослаганда, терма жамоа асосий таркибида сезиларли ўзгаришлар юз берган.
Жумладан, Ўзбекистон миллий терма жамоаси сардори Server Жепаров бу сафар асосий таркибга киритилмаган. Шунингдек, ўтган ўйинда захирадан майдонга тушган ҳимоячи Ислом Тўхтахўжаев, ярим ҳимоячилар Жамшид Искандеров ва Сардор Рашидов асосий таркибга киритилган. Ветнамга қарши ўйинда миллий термада дебют қилган ва биринчи ўйинидаёқ гол уришга муваффақ бўлган «Бухоро» ҳужумчиси Воҳид Шодиев Гонконгга қарши ҳам асосий таркибда тўп суради.
Таркиб қуйидагича кўриниш олган – дарвозабон: Элдор Суюнов («Насаф»); ҳимоячилар: Анзур Исмоилов («Чангчун Ятай», Хитой), Ислом Тўхтахўжаев («Локомотив»), Даврон Ҳошимов («Пахтакор»), Виталий Денисов («Локомотив», Россия); ярим ҳимоячилар: Азиз Ҳайдаров («Аш-Шабоб», БАА), Одил Аҳмедов («Анжи», Россия), Жамшид Искандеров («Пахтакор»), Сардор Рашидов («Бунёдкор»); ҳужумчилар – Воҳид Шодиев («Бухоро»), Игор Сергеев («Пахтакор»).
Ўзбекистон ва Гонконг терма жамоалари ўртасида 6 февраль куни Тошкентда бўлиб ўтган дастлабки ўйинда ҳисоб очилмаган эди. Бироқ, Ўзбекистон миллий терма жамоаси бош мураббийи Миржалол Қосимов фикрича, бўлажак ўйин биринчисидан кескин фарқ қилади ва Тошкентдаги ўйиндан фарқли равишда, Гонконг бу сафар ҳужум қилишига тўғри келади.
Эслатиб ўтамиз, агар Ўзбекистон миллий терма жамоаси ушбу ўйинда ғалаба қозонса, муддатидан аввал Осиё Кубоги-2015 финал босқичи иккинчи йўлланмасини қўлга киритади. «Э» гуруҳидаги дастлабки йўлланма БААга насиб этган, Вьетнам терма жамоаси эса йўлланмага эга чиқиш ҳуқуқидан маҳрум бўлиб улгурган, деб ёзади Kun.uz
Изоҳ (0)