Бейсболчи Девид Ортис олган селфи сабабли АҚШ президенти Барак Обама «тасодифан» Galaxy Note 3 смартфони рекламаси қаҳрамонига айланганлиги хусусида хабар берган эдик. Бу воқеага АҚШ маъмурияти норозилик билдирди, деб ёзади The Wall Street Journal нашри.
Хабар берганимиздек, Ортис бу селфини ўз Twitter-аккаунтига жойлаштирган. Бундан ташқари, сурат Samsung компаниясининг аккаунтида ҳам пайдо бўлган. Булар эса селфи атайин реклама учун олинганлигини кўрсатиб турибди. Бироқ бейсболчининг ўзи бунинг реклама шартномасига кирмаслигини таъкидламоқда.
АҚШ президентининг матбуот котиби Жей Карни изоҳига кўра, давлат раҳбарининг фотосуратини тижорат мақсадларида ишлатиш режаси ҳақида Оқ уйга хабар қилинмаганлиги сабабли эътироз билдирилган.
Ҳуқуқшунослар суратнинг микроблоглар хизматидан ўчириб ташланиши учун ҳаракат қилишадими ёки йўқми – бу масалага Карни аниқлик киритмаган.
Изоҳ (0)