Farg‘ona viloyatining Qo‘qon shahrida qo‘rqitib qo‘yish maqsadida bolani mashina yukxonasiga solib harakatlangan erkakka jinoyat ishi qo‘zg‘atildi. Bu haqda “Daryo”ga Bosh prokuratura matbuot xizmati rahbari Hayot Shamsutdinov ma’lum qildi.
14-may kuni soat 19:30 larda Qo‘qon shahar Obod yurt ko‘chasida yashovchi erkak ushbu ko‘chada o‘ynab yurgan 6 yoshli bolani yashash xonadoni devori va oynasiga tosh otganligida gumon qilib, undan o‘ch olish maqsadida, uning qarshiligiga qaramasdan, o‘ziga tegishli Nexia-2 yukxonasida hayot yoki sog‘liq uchun xavfli bo‘lgan sharoitda saqlagan holda harakatlangan.
Shu vaqt voyaga yetmagan bolaning onasi avtomashinani to‘xtatib, farzandini ozod qilgan.
Farg‘ona viloyati IIB holat yuzasidan fuqaroga nisbatan Ma’muriy javobgarlik to‘g‘risidagi kodeksning 183-moddasi tartibida hujjatlar rasmiylashtirilganini bildirgandi.
Bosh prokuratura Qo‘qon shahar IIB huzuridagi Tergov bo‘limi tomonidan Jinoyat kodeksining 138-moddasi (zo‘rlik ishlatib, g‘ayriqonuniy ravishda ozodlikdan mahrum qilish) bilan jinoyat ishi qo‘zg‘atilganini ma’lum qildi.
Gumon qilinuvchi protsessual tartibda ushlangan.
Izoh (0)