Markaziy bank Telegram Ads imkoniyatlaridan foydalanib yangi usulda firibgarlik qilinayotganidan ogohlantirdi.
Ma’lum qilinishicha, bugungi kunda firibgarlar pul mablag‘lariga ehtiyojmand fuqarolarni qiziqtirish uchun Telegram Ads imkoniyatlaridan foydalanib, ommalashgan kanallarda “bir zumda kredit olish” mazmunidagi yolg‘on xabarlarni reklama qilmoqda.
Ushbu reklama havolasida ko‘rsatilgan Crediitum nomli botga o‘tilganda foydalanuvchiga kredit ajratishga doir oddiy savollar berilib, so‘rovnoma so‘ngida Aynura ismli menejer bilan bog‘lanish tugmasi paydo bo‘ladi.
Mazkur menejer akkaunti firibgarlarga tegishli bo‘lib, ular bilan muloqot qilish orqali shaxsga doir va bank karta ma’lumotlarini hamda tasdiqlash kodlarini berish yoki zararli “APK” ilovalarni smartfonga o‘rnatish bank kartasidagi mablag‘lar o‘g‘irlanishiga olib kelishi mumkin.
“Telegram messenjerida namoyish etilayotgan reklamalarga nisbatan ehtiyotkor munosabatda bo‘ling”, deya ogohlantirdi Markaziy bank matbuot xizmati.
Markaziy bank 2024-yilda firibgarlarning internet tarmog‘idan soxta telefon raqamlari orqali fuqarolarga qo‘ng‘iroq qilish holatlari kuzatilayotganini ma’lum qilgandi. Firibgarlar o‘zini Markaziy bank xodimi sifatida tanishtirib, fuqarolarning ishonchiga kirib, uni Telegram’da Markaziy bank nomidan ochilgan soxta qo‘llab-quvvatlash chatga qo‘shishga uringan. Shu orqali fuqarolarning bank kartalariga oid ma’lumotlarini qo‘lga kiritib, pul mablag‘larini o‘zlashtirgan.
O‘sha yili Markaziy bank firibgarlikning yangi turidan ogohlantirdi. Firibgarlar messenjerlar orqali fuqarolarga Markaziy bankning ramziy belgilari tushirilgan soxta hujjatlar yuborib, ularning mobil qurilmalariga zararli ilovalarni o‘rnatishga uringan.
Izoh (0)