Bugun, 13 dekbar kuni prezident Shavkat Mirziyoyev raisligida ijtimoiy himoya sohasida amalga oshirilgan ishlar va 2025-yildagi vazifalar yuzasidan o‘tkazilgan videoselektor yig‘ilishda denovlik Dilorom Yo‘ldoshevaga “Mardlik” ordeni tantanali topshirildi.
Tahlillar ko‘rsatganidek, baʼzi nogironligi bor insonlarda psixologik bosimlar sababli o‘ziga bo‘lgan ishonch yetishmaydi. Lekin o‘zida kuch topib, og‘ir vaziyatdan chiqib, qahramonlik ko‘rsatayotgan odamlar ham ko‘pligi taʼkidlandi.
Prezident dunyoning eng ruhlantiruvchi Top-100 ayoli ro‘yxatiga kirgan denovlik Dilorom Yo‘ldoshevaning ishlarini eʼtirof etdi. Bu ayol nogironligi bor bo‘lsa-da, tikuv korxonasini ochib, 40 nafar kambag‘al xotin-qizlarni ishli qilgan.
Mana shunday irodali, matonatli insonlarni hammaga o‘rnak qilib ko‘rsatsak, ular bilan har qancha faxrlansak arziydi, dedi davlat rahbari.
Kelgusi yilda bunday insonlar haqida kamida 5 ta motivatsion hujjatli va badiiy filmlar suratga olish muhimligi taʼkidlandi. Bu boradagi ishlarni muvofiqlashtirish Ijtimoiy himoya milliy agentligi direktorining birinchi o‘rinbosari Shahnoza Mirziyoyeva zimmasiga yuklatildi.
Izoh (0)