Avvalroq, Qashqadaryo viloyatining Chiroqchi tumani hokimi Fayzulla Yusupov fuqaroga qo‘l ko‘targani haqida xabar berilgandi. Holat yuzasidan Qashqadaryo viloyati hokimligi axborot xizmati qo‘shimcha maʼlumot berdi.
Unda keltirilishicha, ushbu masala viloyat hokimligi apparat yig‘ilishida keskin muhokama qilingan. Tuman hokimi Fayzulla Yusupov shu va ish faoliyatida yo‘l qo‘ygan boshqa kamchiliklari uchun intizomiy jazoga tortilgan.
“Tuman hokimi har bir fuqaro bilan xushmuomala va hurmat bilan munosabatda bo‘lishi, muloqot chog‘ida odob-axloq qoidalariga qatʼiy rioya qilishi uqtirildi va kelgusida bu kabi holatlarga yo‘l qo‘ygan taqdirda tegishli javobgarlikka tortilishi to‘g‘risida ogohlantirildi”, deyiladi xabarda.
Fayzulla Yusupov viloyat Moliya bosh boshqarmasi boshlig‘i lavozimida ishlagan paytda xodimini “mol”, “eshak” deya haqoratlab, jamoatchilik e’tiboriga tushgandi. Mazkur audioyozuvda sobiq boshqarma boshlig‘i, ayni kunda hokimlik qilayotgan Yusupovning “O‘zingni o‘zing ossang bo‘lmaydimi?”, “Zamon to‘g‘ri kelganda, peshonangdan otardim”, “Ayollar, ko‘kragingni ochib yurma bu yerda. Hech kim sening ko‘kragingni ko‘raman deb kelayotgani yo‘q, boshqa joyda ochib ko‘rsat”, “Hokimingga chiqaman, qani, bir minutda jazolab bermasin-chi, sendaqa moliya mudirchalarini”, degan gaplari yangragandi. Shundan so‘ng u ogohlantirish olgandi.
Izoh (0)