Shavkat Mirziyoyev Temiryo‘l transporti xodimlari kuni munosabati bilan soha vakillariga tabrik yo‘lladi. Bu haqda Prezident matbuot xizmati xabar berdi.
Prezident tashabbusi bilan 2017-yildan buyon avgust oyining birinchi yakshanbasi Temiryo‘l transporti xodimlari kuni sifatida nishonlab kelinmoqda. Shu munosabat bilan bugun tashkil etilgan tantanali tadbirda tabrikni prezident matbuot kotibi Sherzod Asadov o‘qib eshittirdi.
Qutlovda temiryo‘l sohasidagi islohotlarning samaralari alohida qayd etildi.
“Jumladan, joriy yilda Qoraqalpog‘istonni Xorazm viloyati bilan bog‘laydigan yangi temiryo‘l hamda Amudaryo orqali muhtasham ko‘prik foydalanishga topshirildi. Temiryo‘llarni elektrlashtirish, yuqori tezlikda harakatlanadigan poyezdlarni ko‘paytirish ishlari jadal davom ettirilmoqda.
Mamlakatimizning xalqaro transport va tranzit salohiyatini yuksaltirish borasida ham yangi ufqlar ochilmoqda – strategik ahamiyatga ega Xitoy – Qirg‘iziston – O‘zbekiston temiryo‘lini qurish bo‘yicha amaliy ishlar boshlandi.
Prezidentimiz temiryo‘l tizimi oldida turgan o‘ta dolzarb vazifalarni hal qilishda soha xodimlari yanada ulkan kuch-g‘ayrat bilan mehnat qilib, mamlakatimizning temiryo‘l transporti sohasidagi salohiyatini oshirishga munosib hissa qo‘shishlariga ishonch bildirdi va ularga yangi yutuqlar tiladi.
Kasb bayramingiz muborak bo‘lsin, hurmatli temiryo‘l transporti xodimlari!”, deyiladi xabarda.
Izoh (0)