Vazirlar Mahkamasining qarori bilan “Tadbirkorlik subyektlarining barqarorlik reytingini aniqlash tartibi to‘g‘risidagi nizomni tasdiqlash haqida”gi qarorga o‘zgartirish va qo‘shimchalar kiritilmoqda, deb xabar beradi Norma.
Xususan, hujjat bilan xo‘jalik yurituvchi subyektlarning EBITDA asosidagi rentabellik darajasini aniqlashga qo‘yiladigan talablar yumshatilmoqda. Bunda agar EBITDA bo‘yicha rentabellik darajasi xo‘jalik yurituvchi subyekt faoliyat yuritayotgan soha bo‘yicha o‘rtacha ko‘rsatkichdan:
- 20 foiz va undan yuqori bo‘lsa — 10 ball;
- 15-20 foiz — 8 ball;
- 10-15 foiz — 6 ball;
- 5-10 foiz — 4 ball;
- 5 foiz — 2 ball beriladi.
Bundan tashqari hujjat bilan quyidagilar nazarda tutiladi:
- “Tadbirkorlik subyektlarining barqarorlik reytingi” elektron platformasi bilan integratsiyalash uchun axborot tizimlari mazmunini qayta ko‘rib chiqish;
- elektron hisob-fakturalarning holatini baholash jarayonini qonunchilikda belgilangan muddatlarda yakunlash;
- QQS va foyda solig‘i to‘lovchilari uchun alohida Qoraqalpog‘iston, viloyatlar va Toshkent shahri bo‘yicha, shuningdek, aylanmadan olinadigan soliq to‘lovchilari uchun alohida tumanlar (shaharlar) bo‘yicha ro‘yxatdan o‘tgan joyiga qarab o‘rtacha ko‘rsatkichlarni hisoblash tartibini takomillashtirish.
Hujjat Qonun hujjatlari maʼlumotlari milliy bazasida davlat tilida eʼlon qilindi va 2024-yil 2-avgustdan kuchga kirdi.
Avvalroq O‘zbekistonda yil yakunigacha tadbirkorlar loyihalari uchun 1,4 trillion so‘mlik yordam berilishi kutilayotgani to‘g‘risida xabar berilgandi.
Izoh (0)