Toshkent viloyatining Quyi Chirchiq tumanida sutkasiga 1 million kub metr oqova suv tozalash quvvatiga ega bo‘lgan zamonaviy oqova suv tozalash inshooti quriladi.
“O‘zsuvta’minot” matbuot xizmatining xabar qilishicha, loyiha Abu Dhabi Sustainable Water Solutions va uning texnologik hamkorlari sifatida tanlangan SUEZ (Fransiya) va Marubeni (Yaponiya) kompaniyalari konsorsiumi tomonidan amalga oshiriladi.
Unga ko‘ra, Quyi Chirchiq tumani “Surum” mahalla fuqarolar yig‘ini hududida sutkasiga 1 million metr kub oqova suv tozalash quvvatiga ega bo‘lgan zamonaviy oqova suv tozalash inshooti va 42 kilometrli oqova suv kollektorlarini qurish ishlari ko‘zda tutilgan.
Loyihaning dastlabki parametrlariga ko‘ra, birinchi bosqichda inshootning quvvati sutkasiga 1 million kub metr bo‘lib, keyinchalik 1,5 million kub metrni tashkil etadi.
“Loyihaning afzalligi shundaki, unda zamonaviy texnologiyalarni joriy qilish natijasida, oqova suv tozalash jarayoni samaradorligi yanada oshirilishi va resurslardan tejamkorlik bilan foydalanish ta’minlanadi. Ya’ni 10 million kilovattdan ko‘proq elektr energiya iqtisod qilinishiga zamin yaratiladi.
Shuningdek, ushbu loyiha nafaqat texnik infratuzilmani rivojlantiradi, balki Toshkent shahrining Sergeli, Bektemir va Yangihayot tumanlaridagi sanitar-epidemiologik va ekologik holatni yaxshilaydi”, deyiladi xabarda.
Ta’kidlanishicha, loyihaning amalga oshirilishi natijasida 1,5 millionga yaqin aholining oqova suv xizmati yaxshilanadi va 500 mingdan ortiq aholi hamda yuzdan ortiq korxona-tashkilotlar markazlashgan oqova suv xizmati bilan ta’minlanadi.
Ma’lmot uchun, Abu Dhabi Sustainable Water Solutions (SWS) BAAdagi oqova suvlarni yig‘ish, tozalash va qayta ishlatishning yagona tashkilotchisidir.
Izoh (0)