O‘zbekistonda 1-avgustdan boshlab avtomobillarga gaz to‘ldirish shoxobchalarida bir kub metr metan gaz narxi oshgani haqida xabarlar tarqalmoqda. Biroq o‘rganishlar barcha hududlarda ham metan narxi o‘zgarmaganini, ayrimlarida eski narxi, ayrimlarida esa 4250 so‘mgacha sotilayotganini ko‘rsatmoqda.
2024-yil 25-may kuni Vazirlar Mahkamasining metan gaz uchun belgilangan eng baland chakana narxning amal qilish muddatini uzaytirish haqidagi qarori qabul qilingan va 1-avgustga qadar avtomobillarga gaz to‘ldirish shoxobchalarida bir kub metr metan gazning eng baland narxi 3750 so‘m etib belgilangan edi.
Moliya vazirligi axborot xizmatining “Daryo”ga ma’lum qilishicha, metan gaz uchun belgilangan eng baland chakana narxning amal qilish muddati uzaytirilmagan.
“Tadbirkorlar metan gaz narxini o‘zlari mustaqil belgilaydi”, deya ta’kidladi vazirlik mutasaddisi.
Qayd etish kerakki, 2023-yilning sentyabr oyida qabul qilingan hukumat qarori bilan avtomobillarga gaz to‘ldirish shoxobchalarida metan gaz narxi dastlab 3250 so‘m, shu yilning aprelidan 3350 va 1-iyundan boshlab esa 3750 so‘mdan oshib ketmasligi belgilangan edi.
Ijtimoiy tarmoqlarda, shuningdek, propan gaz narxi 5800-6500 so‘mgacha oshgani haqida xabar berilmoqda.
Izoh (0)