“AQSHning tashkilotdan chiqishi kutilgan edi” — YUNESKO bosh direktori

YUNESKO bosh direktori Odre Azule AQSHning tashkilotdan chiqish qarori yuzasidan afsusdaligini bildirib, ayni paytda voqealarning bunday rivojlanishini kutilgan hodisa deb atadi.

“Men prezident Donald Trampning Amerika Qo‘shma Shtatlarini YUNESKOdan yana olib chiqish qaroridan chuqur afsusdaman. Bu qaror 2026 yil dekabr oyi oxirida kuchga kiradi. Ushbu qaror ko‘p tomonlamalikning asosiy tamoyillariga zid bo‘lib, birinchi navbatda, Amerika Qo‘shma Shtatlaridagi ko‘plab hamkorlarimizga - obyektlarni Jahon merosi ro‘yxatiga kiritish, “Ijodkor shahar” maqomini olish va universitet kafedralarini tashkil etishga intilayotgan hamjamiyatlarga ta’sir ko‘rsatishi mumkin”, dedi Azule.

Uning ta’kidlashicha, bu qaror “kutilgan va YUNESKO unga tayyorgarlik ko‘rgan”.

Azule so‘nggi yillarda tarkibiy islohotlar va “moliyalashtirish manbalarini xilma-xil qilish” amalga oshirilganini eslatgan. Hozirda AQSHning hissasi tashkilot umumiy byudjetining 8 foizini tashkil etishini bildirgan.

“Ayni paytda tashkilot hech qanday qisqartirishlar imkoniyatini ko‘rib chiqmayapti”, deya ta’kidladi u.

YUNESKO Bosh direktori 2018-yilda AQSH Trampning birinchi prezidentlik muddatida tashkilot bilan hamkorlikni davom ettirishdan xuddi shunday tarzda bosh tortganida “vaziyat tubdan o‘zgargani” va tashkilotdagi siyosiy keskinlik yumshaganiga qaramay, “aynan o‘sha sabablar” keltirilganini eslatgan.

“Bu da’volar, shuningdek, YUNESKOning sa’y-harakatlari, ayniqsa, Xolokost ta’limi va antisemitizmga qarshi kurash sohasidagi faoliyati haqiqatga ziddir”,- deya qo‘shimcha qildi u Oq uy vakilining “Isroilga qarshi va yahudiylarga qarshi tashabbuslar”ni ilgari surish haqidagi da’volariga javoban.

Azule Vashingtondagi amaldagi ma’muriyat qaroridan qat’i nazar, YUNESKO “resurslarning muqarrar qisqarishiga qaramay, vazifalarni bajarishda davom etishi”ni ma`lum qilgan. Uning ta’kidlashicha, YUNESKO AQSHni “doimo qutlaydi" va xususiy sektor hamda akademik doiralardagi amerikalik hamkorlar bilan hamkorlikni davom ettiradi, shuningdek, ushbu mamlakat hukumati bilan muloqotni davom ettirish niyatida.

Bundan avval AQSH prezidenti Donald Tramp mamlakatni BMTning Ta’lim, fan va madaniyat masalalari bo‘yicha tashkiloti (YUNESKO) tarkibidan chiqarishni rejalashtirayotgani, bunga sabab sifatida tashkilotning Amerikaga va Isroilga qarshi kayfiyatini, shuningdek, “voukizm”dan noroziligini ko‘rsatayotgani ma`lum qilingandi.