Dunyodagi eng yirik yopiq suv havzasi bo‘lgan Kaspiy dengizining sathi tarixiy past darajaga tushib ketdi. Bu haqda Rossiyaning “TASS” agentligi Astraxanda joylashgan Volga-Kaspiy baliqchilik tadqiqot instituti ma’lumotiga asoslanib xabar berdi.
Mutaxassislarning ta’kidlashicha, hozirda dengiz sathi Boltiq dengizi darajasidan 29 metr pastga tushgan. Olimlar bu jiddiy oqibatlarga olib kelishidan ogohlantirdi.
Tadqiqotga ko‘ra. “suv sathining eng keskin pasayish Rossiya va Qozog‘iston bilan chegaradosh shimoliy hududda kuzatilgan. Bu yerda dengiz chekinib, keng maydonlarda uning tubi ochilib qolgan. Mutaxassislar aynan ushbu hudud flora va faunaga boy ekanini ta’kidlashmoqda.
Kaspiy dengizi nega qurib bormoqda?
Olimlar fikricha, bunga iqlim o‘zgarishi natijasida bug‘lanishning ortishi hamda daryolardan keladigan suv oqimining kamayishi kabi omillar sabab bo‘lgan. Xususan Volga va Ural daryolarining ko‘lga quyiladigan oqimi qisqargan.
Birgina Volga daryosi Kaspiyga tushadigan jami suvning 80 foizini ta’minlaydi. Ammo Rossiyada gidrotexnika inshootlari qurilishi va qishloq xo‘jaligi sug‘orish tizimlarining kengaygani sabab uning oqimi kamaygan.
Ekotizim xavf ostida
Suv sathining pasayishi Kaspiy dengizi ekotizimiga jiddiy tahdid solmoqda. Jumladan, qimmatbaho baliq turlari va Kaspiy tyulenlari kabi noyob hayvonlar yo‘qolib ketish xavfi bilan yuzlashyapti. Qolaversa, dengiz chekingan hududlardan atmosferaga yirik miqdorda chang va tuz zarralari ko‘tarilishi mumkin.
Izoh (0)