Italiya prokuraturasi 2026-yilgi Milan va Kortina-d’Ampetsso shaharlarida o‘tkaziladigan Olimpiyada o‘yinlari uchun inshootlar qurilishi bo‘yicha tenderlar o‘tkazishda ehtimoliy korrupsiya holatlarini tergov qilmoqda. Bu haqda Inside the Games portali xabar berdi.
Ma’lumotlarga ko‘ra, prokuratura organlari korrupsiya, hujjatlarni soxtalashtirish va mansab vakolatini suiiste’mol qilish kabi ehtimoliy qonunbuzarliklarni tekshirmoqda. Tergov doirasida 74 kishi, jumladan Milan meri Juzeppe Sala ham bor. U manfaatlar to‘qnashuvini yashirganlik va qurilishga ruxsat beruvchi qo‘mitaga tazyiq o‘tkazganlikda ayblanmoqda.
Tergov asosan shahar markazidagi yirik ko‘chmas mulk qurilishi loyihasiga qaratilgan. Biroq u Olimpiya majmuasi kabi atrofdagi hududlardagi loyihalarni ham qamrab olmoqda. Olimpiya qishlog‘ida tintuvlar, hibsga olishlar va mablag‘larni musodara qilish orqali tekshiruvlar o‘tkazilmoqda.
O‘tgan haftadagi operatsiyalar davomida idoralar va xususiy uylarda tintuvlar o‘tkazilib, oltita hibsga olish orderi berilgan va shaxsi oshkor etilmagan qurilish bilan shug‘ullanuvchi tadbirkordan 120 ming yevro naqd pul topilgan. Sud manbalariga ko‘ra, pullar uning uyini tintuv qilish paytida topilgan.
ABC telekanalining xabar berishicha, Sala ayblovlarni rad etgan va “vijdoni toza” ekanini aytib, iste’foga chiqishdan bosh tortgan.
Ta’kidlanishicha, Olimpiada—2026 tashkiliy qo‘mitasi javobgar sifatida ko‘rsatilmagan, biroq o‘yinlarni tashkil etuvchi jamg‘armaning huquqiy maqomi sinchkovlik bilan o‘rganilmoqda.
Italiyadagi qishki Olimpiya o‘yinlari 2026-yilning 6—22-fevral kunlari bo‘lib o‘tadi.
Izoh (0)