“Liverpul” Bundesligada o‘ynaydigan hujumchi uchun 100 mln yevro sarflashi mumkin

Arne Slot boshqaruvidagi “Liverpul” yozgi transferlar oynasida hujum chizig‘ini kuchaytirishga kirishdi. Klub Germaniyaning “Ayntraxt” jamoasida to‘p surayotgan 23 yoshli hujumchi Ugo Ekitike bilan shartnoma bo‘yicha to‘liq kelishuvga erishgan. Bu haqda futbol jurnalisti Fabris Xoakin o‘zining ijtimoiy tarmoqlardagi sahifasida ma’lum qilgan.

Manbalarga ko‘ra, mersisaydliklar fransiyalik futbolchi bilan olti yillik shartnoma borasida kelishgan. Ekitike aynan “Liverpul” safida to‘p surishni istagani sababli unga qiziqish bildirgan “Nyukasl” bilan muzokaralarni to‘xtatgan.

BBC xabariga ko‘ra, “Liverpul” ushbu transferni dam olish kuniga qadar rasmiylashtirib, hafta oxirigacha e’lon qilishi mumkin. Avvalroq “Ayntraxt” Ekitike uchun “Nyukasl” taklif qilgan 70 million funt sterling (81 million yevro) miqdoridagi taklifni rad etgandi. Shu bois, “Liverpul”ning taklifi undan yuqori bo‘lishi kutilmoqda. Ba’zi manbalarda bitim qiymati 100 million yevroga yetishi mumkinligi ta’kidlanmoqda.

Ugo Ekitike faoliyatini Fransiyaning “Reyms” klubida boshlagan. Keyinchalik “PSJ” safida ham o‘ynagan hujumchi hozirda Bundesligadagi eng istiqbolli yosh futbolchilardan biri hisoblanadi. O‘tgan mavsumda u “Ayntraxt” safida liga doirasidagi 33 ta o‘yinda maydonga tushib, 15 ta gol muallifiga aylangan. Transfermarkt portali Ekitikening qiymatini 75 million yevroga baholagan.