Texnologiyalar bo‘yicha mashhur Tom’s Guide nashri tahlilchilari tomonidan tuzilgan navbatdagi reytingda 2025-yilning eng yaxshi smartfonlari e’lon qilindi. Baholash davomida qurilmalarning umumiy ishlash samaradorligi, kamera sifati va avtonom ishlash muddati asosiy mezon sifatida qaraldi. Ekspertlar ta’kidlashicha, reytingda ilgari surilgan hech bir model funksionallik va texnik imkoniyatlar jihatidan Samsung Galaxy S25 Ultra bilan tenglasha olmaydi.
Mazkur model 6,9 dyuymli AMOLED displey, eng yangi Snapdragon 8 Elite chipi va to‘rt datchikli professional kamera tizimi bilan jihozlangan. Qurilma mutaxassislar tomonidan “2025-yilning eng ilg‘or flagman smartfoni” sifatida e’tirof etildi. Shu bilan birga, Galaxy S25 Ultra’ning kamchiliklari sifatida uning baland narxi va Qi2 simsiz quvvatlash texnologiyasini qo‘llab-quvvatlamasligi alohida qayd etildi.
Reytingda ikkinchi o‘rinni Apple iPhone 16 Pro Max egalladi. Ushbu qurilma iOS tizimidagi eng yaxshi smartfon sifatida tan olindi. Model Super Retina XDR OLED displey, yuqori unumdorlikka ega A18 Pro protsessori va tasvir sifati bo‘yicha professional kamerasi bilan ajralib turadi. Tahlilchilar iPhone 16 Pro Max’ning kamchiliklariga quvvatlash tezligining sustligi va sun’iy intellekt funksiyalarining to‘liq joriy etilmaganini kiritgan.
Uchinchi o‘rinni egallagan Google Pixel 9 Pro esa sun’iy intellekt imkoniyatlarining kengligi bilan ajralib turadi. Biroq u umumiy ishlash tezligi va batareya xizmat davomiyligi bo‘yicha raqobatchilaridan biroz ortda qoldi. Shunga qaramay, 4 700 mA/soat sig‘imdagi akkumulyator va samarali Tensor G4 chipi yordamida qurilma sinov davomida 13 soat 30 daqiqa ishlashga muvaffaq bo‘lgan.
Reytingning to‘rtinchi pog‘onasini Google Pixel 9a, beshinchi o‘rnini esa OnePlus 13 egalladi. Ekspertlar OnePlus 13 modelini narx va sifat darajasiga ko‘ra Android flagmanlari orasida eng optimal tanlov deb hisoblamoqda.
Bundan tashqari, Tom’s Guide nashri tuzgan ro‘yxatdagi kuchli o‘ntalikka quyidagi smartfonlar ham kiritilgan:
iPhone 16
Nothing Phone 3a Pro
Samsung Galaxy S25
Motorola Razr Ultra
Samsung Galaxy S25 Edge
Izoh (0)