“Toshkent shahar elektr tarmoqlari”ning 28 nafar mansabdori intizomiy javobgarlikka tortildi

Toshkent shahrining turli tumanlarida elektr energiyasi ta’minoti bilan bog‘liq avariyalar hamda tarmoqlarda kuchlanishning pasayib ketishi ortidan “Toshkent shahar elektr tarmoqlari” MCHJ boshlig‘i va 27 nafar mansabdor shaxs intizomiy javobgarlikka tortildi. Bu haqda O‘zA xabar bermoqda.

Ta’kidlanishicha, Toshkent shahrining turli tumanlarida elektr energiyasi ta’minoti bilan bog‘liq avariyalar hamda tarmoqlarda kuchlanishning pasayib ketishi kuzatilgani bois Bosh prokuratura tomonidan mutaxassislarni jalb etgan holda o‘rganish olib borilgan.

O‘rganishlar davomida quyidagi xato va kamchiliklar aniqlangan. Jumladan, hozirda tizimdagi 1154-raqamli Call-markaz orqali murojaatlarni qabul qiluvchi operatorlar 5 nafarni tashkil etadi. Shu sababli operator bilan ulanish uchun 60-70 tagacha navbat yuzaga kelgan. O‘rganish natijasida markazga qo‘shimcha 10 nafar operator biriktirildi.

Bundan tashqari, cheklovlar va avariyalar haqida iste’molchilarni vaqtida xabardor qilish ham talab darajasida tashkil etilmagan. Iyul oyining 23 kunida 64 ta avariya bo‘yicha iste’molchilar ogohlantirilmagan, 112 tasi bo‘yicha esa kech ogohlantirilgan.

Ta’minotdagi avariyalar, rejaviy uzilishlar haqida iste’molchilarni xabardor qilish, avariya holatlarini zudlik bilan bartaraf etish yuzasidan matbuot va dispetcherlik xizmatlari xodimlari rasman ogohlantirilgan.

Aniqlanishicha, jamiyatga tegishli mavjud 11 ta maxsus laboratoriya avtomashinasining 6 tasi zamon talablariga javob bermaydi, shundan tungi vaqtda bor-yo‘g‘i ikkitasi navbatchi sifatida o‘z xizmatini o‘tamoqda. Bu bir vaqtning o‘zida bir nechta hududda o‘chishlar sodir bo‘lgan taqdirda qisqa muddatda avariyani aniqlash va to‘liq bartaraf etish imkonini bermayapti.

O‘rganishlar yakunlari bo‘yicha tizimli muammolarga yo‘l qo‘ygan 28 nafar mansabdor shaxs, jumladan, “Toshkent shahar elektr tarmoqlari” MCHJ boshlig‘i va 11 nafar tuman elektr ta’minoti korxonalari boshliqlari, 13 nafar tuman korxonasi bosh muhandislari, 3 nafar tuman korxonasi dispetcherlik xizmati xodimlari intizomiy javobgarlikka tortilgan.