Zominda Xitoy kompaniyasi bilan xavfsizlik va tibbiyot texnikalari ishlab chiqarish yo‘lga qo‘yiladi

Shavkat Mirziyoyev Zomin texnoparkida rejalashtirilgan yangi loyihalar taqdimoti bilan tanishdi. Bu haqda Prezident matbuot xizmati xabar berdi. 

Ushbu texnopark 400 gektar maydonda barpo etilmoqda. Birinchi bosqichda 9 loyiha bo‘yicha ishlar boshlangan. Endi ikkinchi bosqich doirasida yana 5 ta loyiha shakllantirilgan.

Jumladan, Longze Investment Group kompaniyasi bilan hamkorlikda xavfsizlik va tibbiyot texnikalari, Foxit kompaniyasi bilan noutbuk, planshet, server, router kabi zamonaviy mahsulotlar ishlab chiqarishni yo‘lga qo‘yish mo‘ljallanmoqda. Shuningdek, charm va sport poyabzallari, qurilish materiallari, chinni idishlar, kimyo mahsulotlari bo‘yicha loyihalar ko‘zda tutilgan.

Ularning umumiy qiymati 250 million dollar atrofida bo‘lib, yuqori qiymatli tovarlar ishlab chiqariladi. Tayyor mahsulotlarning qariyb 70 foizi tashqi bozorga yo‘naltiriladi.

Qayd etilishicha, Jizzax viloyatida xorijiy investitsiyalar miqdori yil sayin o‘sib bormoqda. 2018-yilda viloyatda bor-yo‘g‘i 18 million dollar xorijiy investitsiya o‘zlashtirilgan bo‘lsa, o‘tgan yili bu raqam 1 milliard dollardan oshgan. Oxirgi sakkiz yilda viloyatga 3,7 milliard dollar investitsiya kiritilgan, 4 mingdan ziyod sanoat korxonalari ishga tushgan. Chet el kapitali ishtirokidagi korxonalar soni 260 tadan oshgan.

Shavkat Mirziyoyev 22-iyul kuni Jizzax viloyatiga tashrif buyurib, Zomin texnoparki maxsus sanoat zonasini borib ko‘rdi. Bu majmua qurilishini o‘tgan yili 27-iyunda davlat rahbari boshlab bergan edi.

Prezident matbuot kotibining ma’lum qilishicha, tashrif davomida Shavkat Mirziyoyev sanoat va ijtimoiy sohada amalga oshirilayotgan yana bir qator ishlar, yangi ishlab chiqarish quvvatlari va boshqa obyektlar bilan tanishadi.