Oliy taʼlim, fan va innovatsiyalar vazirligi yangi o‘quv yilida talabalarni munosib kutib olish, o‘quv yilining dastlabki kunlarida talabalarni turar joy bilan tezkor ta’minlashda yuzaga keladigan jiddiy muammolarni o‘z vaqtida bartaraf etish maqsadida 1-avgustidan 10-sentyabrigacha bo‘lgan muddat “dolzarb qirq kunlik” sifatida belgilanganini e’lon qildi.
Qayd etilishicha, 2024/2025-o‘quv yilidan boshlab davlat OTMlarining barcha bosqich talabalari belgilangan mezonlar ketma-ketligi asosida talabalarning yotoqxona va ijara xonadonlariga joylashtirilishi bo‘yicha zarur chora-tadbirlar belgilab olindi.
O‘tgan yilgi tajribadan kelib chiqib, barcha OTMlarning asosiy binolari hamda talabalar turar joylariga kirish qismlariga kamida 4 ta joyga Talabalar turar joylariga joylashtirish uchun yordam ko‘rsatish markazlari (infokiosk)ni tashkil etish belgilandi.
Bunda har bir talabani talabalar turar joylariga joylashtirish bo‘yicha yordam ko‘rsatish markazlari (infokiosk) faoliyatini yo‘lga qo‘yish va unga tajribali volontyorlarni biriktirish, shuningdek, eng namunali faoliyat yuritgan “Talabalar turar joylariga joylashtirish uchun yordam ko‘rsatish markazlari” 20 million so‘mdan 30 million so‘mgacha pul mukofotlari bilan rag‘batlantirilishi nazarda tutildi.
Ijara xonadonlari bazasini shakllantirish, talabalarni guruh tyutorlari orqali ijara xonadonlariga joylashishiga ko‘maklashish, oliy ta’lim muassasasi rasmiy veb-sayti orqali yangi topilgan ijara uylari hamda ijara uylari haqidagi ma’lumotlar (manzili, xonadon egasining ismi sharifi, telefoni, ijara uyining narxi ko‘rsatilgan holda)ni e’lon qilish ishlarini samarali tashkil etish bo‘yicha ko‘rsatmalar berildi.
Oliy ta’lim muassasalari rektorlari yotoqxona va ijarada istiqomat qilayotgan talabalar holidan shaxsan xabar olishi, ularga zarur shart-sharoitlar yaratish bo‘yicha chora-tadbirlar tasdiqlagan holda ijara xonadonlariga ham, yotoqxonalarga ham tashriflar har haftada kamida bir marotaba tashkil etilishini tizimli yo‘lga qo‘yiladi.
Toshkent shahri bo‘yicha 29 ta davlat OTMlarida talabalarni turar joy bilan ta’minlash bo‘yicha 60 ta markaz tashkil etilishi rejalashtirilgan. Markazlarda 200 nafardan ortiq ko‘ngilli lider yoshlardan iborat volontyor va tyutorlar talabalarni yotoqxona va ijara xonadonlariga joylashishiga ko‘mak beradi.
1-avgustdan talabalar turar joyi uchun my.gov.uz orqali ariza yuborish jarayonlari boshlandi. Reglamentga muvofiq, ayrim toifadagi talabalar yotoqxonaga ustuvorlik asosida qabul qilinadi. Shunga ko‘ra, talabalar turar joyiga joylashish uchun yo‘llanma dastlab imtiyozli ro‘yxat, so‘ng umumiy ro‘yxatdagi navbat bo‘yicha avtomatik shakllantiriladi.
Izoh (0)