Toshkent shahar hokimi Shavkat Umurzoqov 1-avgust kuni poytaxtning olti tumanida renovatsiya loyihalarini amalga oshirish bo‘yicha qarorlarni imzolagandi. Qarorga ko‘ra, ushbu hududlarda madaniy meros obyektlari ro‘yxati, buziladigan yoki ta’mirlanadigan turar va noturar joylar xatlovdan o‘tkaziladi. Qarorlar jamoatchilik muhokamasiga sabab bo‘lgach, poytaxt hokimligi bu masala yuzasidan qisqacha ma’lumot berdi.
Unda aytilishicha, aholining murojaatlari, binolarning holati hamda boshqa obyektiv sabablarni inobatga olgan holda, shahar ma’muriyati tomonidan fuqarolarning Konstitutsiyada belgilangan huquqlarini ta’minlaydigan, shaharsozlik normalari va qoidalari me’yorlari va aholining manfaatlarini aks ettiruvchi zamonaviy mexanizmni joriy etish to‘g‘risida qaror qabul qilindi.
Renovatsiya loyihasining maqsadi — uy-joy fondini yangilash, avariya holatidagi uy-joylarning ommaviy paydo bo‘lishining oldini olish, hududlarni alohida ko‘p qavatli uylar kesimida emas, balki yaxlit rivojlantirish orqali fuqarolarning turmush sharoitlarini yaxshilashdan iborat.
Bunda binolarning avariyaviylik darajasi va xavfsizlik talablariga muvofiqligi, iqtisodiy va energetik samaradorligi, eskirgan ko‘rinishi va hududning umumiy me’moriy rivojlanishiga mos kelmasligi hisobga olinadi.
“Ma’lumki, Konstitutsiyada nafaqat har bir shaxsning uy-joyga bo‘lgan huquqi, balki xavfsiz yashash huquqi ham o‘z aksini topgan bo‘lib, davlat uy-joy qurilishini rag‘batlantiradi va uy-joyga bo‘lgan huquqni ro‘yobga chiqarish uchun sharoitlar yaratadi”, deyiladi hokimiyat xabarida.
Ta’kidlanishicha, O‘zbekiston shaharsozlik me’yorlari va qoidalari zamonaviy talablarga javob beradigan mehnat, yashash va dam olish joylarining qulayligini ta’minlashga doir talablarni belgilaydi. Renovatsiya ishlari faqat vakolatli tashkilotlar tomonidan avariya holati tasdiqlangan obyektlarda va faqat aholining roziligi bilan amalga oshiriladi. Madaniy yoki me’moriy meros obyektlarida renovatsiya amalga oshirilmaydi.
Ma’lum qilinishicha, Toshkentda qurilgan uylarning foydalanish muddati 50 yilga mo‘ljallangan, aksariyat hollarda kapital ta’mirlash imkoniyati yo‘q, foydalanish muddati tugamoqda.
“Barchamiz tushunamizki, renovatsiya dasturini talab qiladigan uylarning aksariyati o‘z umrini yashab bo‘lgan yoki yaqin yillarda shaharsozlik me’yorlari bo‘yicha yashashga yaroqsiz bo‘lib qoladi.
Binolarning texnik holati bilan bog‘liq xavf, ayniqsa, mamlakatimiz va umuman mintaqaning seysmikligiga ta’sir qiluvchi barqaror iqlim o‘zgarishi tufayli jiddiy tashvish uyg‘otadi.
Vaziyatni xolisona baholasak, ushbu uylarni hozirgi holatida foydalanishda qoldirish muqarrar ravishda poytaxtda avariyaviy uy-joylarining ommaviy paydo bo‘lishiga olib keladi”, deyiladi xabarda.
Qayd etilishicha, renovatsiya qilish ko‘zda tutilgan hududlar mahalliy aholi murojaatlari asosida taklif etilgan va reja tuzilgan. Shuningdek, murojaatlarda keltirilgan uy-joylarning dastlabki tahlili ularning yuqoridagi shaharsozlik me’yorlari talablariga javob bermasligini tasdiqladi.
Shavkat Mirziyoyev 2018-yil dekabrda parlamentga yo‘llagan murojaatnomasida renovatsiya dasturini yaʼni, foydalanish muddati tugab, eskirib qolgan ko‘p qavatli uylar o‘rnida yangi va zamonaviy uylar qurish dasturini ishlab chiqish lozimligini aytgandi.
Toshkent shahar hokimi Shavkat Umurzoqov 2024-yilning boshlarida “O‘zbekiston 24” telekanaliga bergan intervyusida poytaxtda 500 gektardan ortiq maydondagi uy–joylar talabga javob bermaydigan holatdaligi uchun renovatsiya dasturiga kiritilganini ma’lum qilgan.
Renovatsiya — aholi uchun qulay yashash muhitini shakllantirish, yer resurslaridan oqilona foydalanish, hududlarni kompleks ijtimoiy-iqtisodiy rivojlantirish maqsadida, avariya holatidagi mavjud yaroqsiz deb topilgan, shu jumladan, ijtimoiy va muhandislik-transport infratuzilmalari eskirgan, ekspluatatsiya muddati o‘tgan, yaroqsiz holga kelgan turar va noturar joylarni hamda yaroqli turar va noturar joylarni zamonaviy talablariga muvofiq qayta qurish, kapital ta’mirlash, rekonstruksiya qilishga qaratilgan va amalga oshiriladigan intensiv qurilish tadbirlari majmui.
Izoh (0)