Тошкент шаҳар ҳокими Шавкат Умурзоқов 1 август куни пойтахтнинг олти туманида реновация лойиҳаларини амалга ошириш бўйича қарорларни имзолаганди. Қарорга кўра, ушбу ҳудудларда маданий мерос объектлари рўйхати, бузиладиган ёки таъмирланадиган турар ва нотурар жойлар хатловдан ўтказилади. Қарорлар жамоатчилик муҳокамасига сабаб бўлгач, пойтахт ҳокимлиги бу масала юзасидан қисқача маълумот берди.
Унда айтилишича, аҳолининг мурожаатлари, биноларнинг ҳолати ҳамда бошқа объектив сабабларни инобатга олган ҳолда, шаҳар маъмурияти томонидан фуқароларнинг Конституцияда белгиланган ҳуқуқларини таъминлайдиган, шаҳарсозлик нормалари ва қоидалари меъёрлари ва аҳолининг манфаатларини акс эттирувчи замонавий механизмни жорий этиш тўғрисида қарор қабул қилинди.
Реновация лойиҳасининг мақсади — уй-жой фондини янгилаш, авария ҳолатидаги уй-жойларнинг оммавий пайдо бўлишининг олдини олиш, ҳудудларни алоҳида кўп қаватли уйлар кесимида эмас, балки яхлит ривожлантириш орқали фуқароларнинг турмуш шароитларини яхшилашдан иборат.
Бунда биноларнинг авариявийлик даражаси ва хавфсизлик талабларига мувофиқлиги, иқтисодий ва энергетик самарадорлиги, эскирган кўриниши ва ҳудуднинг умумий меъморий ривожланишига мос келмаслиги ҳисобга олинади.
“Маълумки, Конституцияда нафақат ҳар бир шахснинг уй-жойга бўлган ҳуқуқи, балки хавфсиз яшаш ҳуқуқи ҳам ўз аксини топган бўлиб, давлат уй-жой қурилишини рағбатлантиради ва уй-жойга бўлган ҳуқуқни рўёбга чиқариш учун шароитлар яратади”, дейилади ҳокимият хабарида.
Таъкидланишича, Ўзбекистон шаҳарсозлик меъёрлари ва қоидалари замонавий талабларга жавоб берадиган меҳнат, яшаш ва дам олиш жойларининг қулайлигини таъминлашга доир талабларни белгилайди. Реновация ишлари фақат ваколатли ташкилотлар томонидан авария ҳолати тасдиқланган объектларда ва фақат аҳолининг розилиги билан амалга оширилади. Маданий ёки меъморий мерос объектларида реновация амалга оширилмайди.
Маълум қилинишича, Тошкентда қурилган уйларнинг фойдаланиш муддати 50 йилга мўлжалланган, аксарият ҳолларда капитал таъмирлаш имконияти йўқ, фойдаланиш муддати тугамоқда.
“Барчамиз тушунамизки, реновация дастурини талаб қиладиган уйларнинг аксарияти ўз умрини яшаб бўлган ёки яқин йилларда шаҳарсозлик меъёрлари бўйича яшашга яроқсиз бўлиб қолади.
Биноларнинг техник ҳолати билан боғлиқ хавф, айниқса, мамлакатимиз ва умуман минтақанинг сейсмиклигига таъсир қилувчи барқарор иқлим ўзгариши туфайли жиддий ташвиш уйғотади.
Вазиятни холисона баҳоласак, ушбу уйларни ҳозирги ҳолатида фойдаланишда қолдириш муқаррар равишда пойтахтда авариявий уй-жойларининг оммавий пайдо бўлишига олиб келади”, дейилади хабарда.
Қайд этилишича, реновация қилиш кўзда тутилган ҳудудлар маҳаллий аҳоли мурожаатлари асосида таклиф этилган ва режа тузилган. Шунингдек, мурожаатларда келтирилган уй-жойларнинг дастлабки таҳлили уларнинг юқоридаги шаҳарсозлик меъёрлари талабларига жавоб бермаслигини тасдиқлади.
Шавкат Мирзиёев 2018 йил декабрда парламентга йўллаган мурожаатномасида реновация дастурини яъни, фойдаланиш муддати тугаб, эскириб қолган кўп қаватли уйлар ўрнида янги ва замонавий уйлар қуриш дастурини ишлаб чиқиш лозимлигини айтганди.
Тошкент шаҳар ҳокими Шавкат Умурзоқов 2024 йилнинг бошларида “Ўзбекистон 24” телеканалига берган интервьюсида пойтахтда 500 гектардан ортиқ майдондаги уй–жойлар талабга жавоб бермайдиган ҳолатдалиги учун реновация дастурига киритилганини маълум қилган.
Реновация — аҳоли учун қулай яшаш муҳитини шакллантириш, ер ресурсларидан оқилона фойдаланиш, ҳудудларни комплекс ижтимоий-иқтисодий ривожлантириш мақсадида, авария ҳолатидаги мавжуд яроқсиз деб топилган, шу жумладан, ижтимоий ва муҳандислик-транспорт инфратузилмалари эскирган, эксплуатация муддати ўтган, яроқсиз ҳолга келган турар ва нотурар жойларни ҳамда яроқли турар ва нотурар жойларни замонавий талабларига мувофиқ қайта қуриш, капитал таъмирлаш, реконструкция қилишга қаратилган ва амалга ошириладиган интенсив қурилиш тадбирлари мажмуи.
Изоҳ (0)