Microsoft 2-iyul kuni 9 mingg yaqin xodimlarini ishdan bo‘shatayotganini ma’lum qildi. Bu haqda CNN xabar berdi.
Bu qaror so‘nggi oylarda e’lon qilingan qisqartirishlarning uchinchisi hisoblanadi. Microsoft aksiyalari e’londan keyin o‘zgarishsiz qoldi. Xodimlar sonining qisqarishi kompaniya umumiy ishchilarining 4 foizidan kamrog‘iga ta’sir qiladi. Texnologik gigant 2023-yilda ham 10 000 nafar xodimni ishdan bo‘shatgan edi.
“Biz kompaniya va jamoani dinamik bozorda muvaffaqiyatga erishish uchun tashkiliy o‘zgarishlarni amalga oshirishda davom etamiz”, dedi Microsoft vakili.
Kompaniya bayonotida boshqaruv qatlamlari qisqartirilib, xodimlar yangi texnologiyalar bilan ta’minlanayotgani qo‘shimcha qilingan.
Qisqartirishlarga Microsoft o‘z ishchi kuchini yanada samarali qilish uchun sun’iy intellektdan foydalanayotgani ham sabab bo‘lmoqda. Kompaniya bosh direktori Satya Nadella 2025-yil boshida kompaniya dasturlashining 20-30 foizi sun’iy intellekt tomonidan yaratilganini aytgan. Sun’iy intellektga milliardlab sarmoya kiritilayotgani ham ma’lum qilingan.
Kompaniya may oyida o‘z xodimlarining 3 foizini, taxminan 7000 nafar xodimni ishdan bo‘shatgandi. 2024-yil iyul holatiga ko‘ra, kompaniyada 228 ming xodim ish bilan ta’minlangan. Microsoft aprel oyida bulutli biznes va sun’iy intellekt sabab 3 oy ichida choraklik foydasi 18 foizga oshib, 25,8 milliard dollarga yetganini ma’lum qilgan. Kompaniya to‘rtinchi moliyaviy chorak uchun daromadlarini shu oyning oxirida e’lon qilishi kutilmoqda.
Bu yil boshqa texnologik kompaniyalar, jumladan Meta va Bumble ham xodimlar qisqartirilishini amalga oshirgan. Amazon rahbari Endi Jessi iyun oyida sun’iy intellekt oxir-oqibat xodimlar sonini kamaytirishga sabab bo‘lishi haqida ogohlantirgandi.
Izoh (0)