Paleontologlar Fransiyaning janubi-sharqidagi Sent-Viktuar tog‘i atrofida dunyodagi eng yirik dinozavr tuxumlari to‘plamini aniqladi. Bu haqda Agence France-Presse (AFP) xabar bermoqda.
Ma’lum qilinishicha, Eks-an-Provans yaqinidagi hududga norasmiy ravishda “Provans tuxumlari” nomi berilgan. Mutaxassislarning baholashicha, bu yerda har kvadrat metrga bittadan tuxum to‘g‘ri keladi.
Topilmaning noyobligi shundaki, bu yerda tuxumlar dunyoning boshqa joylariga qaraganda ko‘proq uchraydi va bo‘r davridagi sharoitlar ularning a’lo darajada saqlanishiga imkon yaratgan. Suv bosgan tekisliklar va loy-gilli tuproqlar tuxumlarning toshga aylanishini ta’minlagan.
Tuxumlar har yili topilsa-da, ularning aksariyati bo‘sh va urug‘lanmagan, yoki allaqachon tuxumdan bola ochib chiqqan. Embrionlarni topish — olimlar uchun dinozavrlarning turini aniq belgilashga yordam beradigan “Muqaddas Graal” hisoblanadi, ammo hozircha bunga erishib bo‘lmadi.
“Embrionni topmagunimizcha, ularni qaysi tur qo‘yganini aniqlay olmaymiz”, ta’kidladi Tortosa.
Olimlarning so‘nggi yillardagi eng yaxshi topilmalari son va katta boldir suyaklari kabi oyoq-qo‘l suyaklari bo‘lib, ular ehtimol rabdodonlar yoki titanozavrlar singari o‘txo‘r dinozavrlarga tegishli.
Qo‘riqxona noyob merosni talonchilardan himoya qilish maqsadida 1994-yildan beri tashrif buyurish uchun yopiq. Biroq, mintaqa rahbarlari “paleontologik turizm”ni rivojlantirish imkoniyatini ko‘rib chiqmoqda.
“Fransiya sayyohlarni jalb qilish uchun o‘z dinozavrlaridan foydalana olmaydigan yagona mamlakatdir”, deya afsus bilan ta’kidladi Tortosa.
Uning so‘zlariga ko‘ra, boshqa mamlakatlarda hatto bitta dinozavr tishi uchun ham butun boshli muzey barpo etilishi mumkin edi.
Bundan avval britaniyalik olimlar tomonidan AQSHda dinozavrning yangi — it kattaligidagi turi kashf etilgani xabar qilingandi.
Izoh (0)