Germaniyaning Riedlingen shaharchasi yaqinida 27-iyul kuni yo‘lovchi poyezd relsdan chiqib ketdi. Oqibatda 3 kishi halok bo‘lib, yana bir necha yo‘lovchi og‘ir jarohat oldi. Bu haqda mahalliy politsiyaga tayanib BBC xabar berdi.
Ayon bo‘lishicha, halokat 27-iyul kuni kechki payt Stuttgart yaqinidagi Riedlingen shaharchasi hududida sodir bo‘lgan. Voqea sababiga hali aniqlik kiritilmagan, ammo halokat oldidan hududda kuchli bo‘ron kuzatilgani aytilmoqda.
DPA nashrining bildirishicha, poyezdda 100 ga yaqin yo‘lovchi bo‘lgan, 2 ta vagon o‘rmonzor hududida mahalliy vaqt bilan soat 18:10 atrofida ag‘darilib ketgan.
“Hozircha, surishtiruv natijalariga ko‘ra, 3 kishi halok bo‘lgan, yana bir nechta yo‘lovchi og‘ir tan jarohati olgan”, deya bayonot berdi Ulm politsiyasi.
Ijtimoiy tarmoqlarda tarqalgan suratlarda poyezd vagonlari ag‘darilib ketgani, voqea joyida tez yordam guruhlari ishlayotgani aks etgan. Shuningdek, qulab tushgan daraxtlar ham ko‘zga tashlanadi.
Germaniya milliy temiryo‘l kompaniyasi Deutsche Bahn’ning xabar berishicha, poyezd Sigmaringen va Ulm shaharlari orasida 90 kilometr masofani bosib o‘tayotgan bo‘lgan. Kompaniya halokatdan jabrlanganlarga hamdardlik bildirgan.
Germaniya kansleri Freidrix Mers hodisa yuzasidan X ijtimoiy tarmog‘ida bayonot bergan. Xususan, u halok bo‘lganlar uchun hamdardlik bildirib, ularning oilalariga chuqur ta’ziya izhor etgan. Kansler ichki ishlar va transport vazirlari bilan bevosita aloqada ekani va qutqaruvchilarga zarur yordam ko‘rsatilishini ma’lum qilgan.
Izoh (0)