“Janub bilan muloqotga qiziqmaymiz” — Shimoliy Koreya yetakchisining singlisi Janubiy Koreya bilan yarashish ehtimollarini rad etdi

Shimoliy Koreya yetakchisi Kim Chen Inning singlisi Kim Yo Chjon Janubiy Koreya prezidenti Li Chje Myonning yarashishga qaratilgan sa’y-harakatlarini rad etdi. Bu haqda Shimoliy Koreya davlat ommaviy axborot vositalariga tayanib Al Jazeera xabar berdi.

Ma’lum qilinishicha, Kim Yo Chjon Janubiy Koreyaning chegarada tashviqot eshittirishlarini to‘xtatish qarorini “ilgari qilmaslik kerak bo‘lgan ishni vaqtincha bekor qilish” deya izohlagan.

“Agar Seul bir necha hissiyotli so‘zlar bilan avvalgi siyosiy voqealarga ko‘z yumish mumkin deb o‘ylagan bo‘lsa, bu eng katta xatodir”, degan u.

Shuningdek, u janublik rasmiy Kim Chen Inni APEC sammitiga taklif qilishni yoqlab chiqqanini “xomhayol” deb baholagan. Kim Yo Chjonning fikricha, yangi hukumatning AQSH bilan harbiy ittifoqqa ishonchi va Pxenyanga qarshi turishga intilishi avvalgi konservativ prezident Yun Sok Yol davridagi siyosatdan deyarli farq qilmaydi.

“Seul qanday siyosat yuritishidan va qanday takliflar kiritishidan qat’iy nazar, biz ular bilan qiziqmaymiz. Janubiy Koreya bilan uchrashishga ham, gaplashishga ham hech qanday sabab yo‘q”, deya ta’kidlagan Kim Yo Chjon.

Ma’lumot uchun, Janubiy Koreya prezidenti Li Chje Myon iyun oyida Yun Sok Yol iste’foga chiqarilgach, hokimiyat tepasiga kelgan edi. Uning demokratik partiyasi Shimoliy Koreya bilan iliq munosabat tarafdori sanaladi.