Yevokommisiya raisi Ursula fon der Lyayen Pekinni Ukrainadagi urushni tugatishga yordam berish uchun Rossiyaga ta’sir o‘tkazishga chaqirdi. Bu haqda Deutsche Welle xabar berdi.
Pekinda bugun, 24-iyul kuni Yevropa Ittifoqi va Xitoy o‘rtasidagi diplomatik aloqalarning 50 yilligi munosabati bilan sammit bo‘lib o‘tmoqda. Unda Rossiya-Ukraina urushi ham muhokama qilindi. Xususan, ittifoq raisi Xitoy prezidenti Si Szinpinga murojaat qilib, shunday dedi:
“Biz Xitoyni Rossiyaning BMT nizomini hurmat qilishini ta’minlashga undaymiz. Shuningdek, Pekinni Ukrainaga qarshi agressiv urushni to‘xtatish uchun o‘z ta’siridan foydalanishga chaqiramiz”.
Ursula fon der Lyayen sammitda YI va Xitoy munosabatlarini qayta ko‘rib chiqishga ham chaqirgan. U 2024-yili YIdagi 305,8 milliard yevrolik savdo defitsitini eslab o‘tib, bu muammoni Xitoy bilan savdo aloqalarini yaxshilash hisobiga hal qilish mumkinligini ta’kidladi.
“Hamkorligimiz chuqurlashgani sari nomutanosibliklar ham ortib bormoqda. Biz burilish nuqtasiga yetib keldik. Ikki tomonlama munosabatlarimizni qayta ko‘rib chiqish zarur”, dedi ittifoq raisi.
Xitoy rahbari bunga javoban YIni to‘g‘ri strategik qarorlar qabul qilishga chaqirdi. U tomonlar o‘zaro kelishmovchiliklarga qaramay, umumiy til topa olishini ta’kidladi.
“Xalqaro vaziyat qanchalik murakkab va chalkash bo‘lmasin, Xitoy va YI uchun munosabatlarni mustahkamlash, o‘zaro ishonchni oshirish va hamkorlikni chuqurlashtirish muhim”, dedi Si Szinpin.
Izoh (0)