AQSH prezidenti Donald Tramp mamlakatni BMTning Ta’lim, fan va madaniyat masalalari bo‘yicha tashkiloti (YUNESKO) tarkibidan chiqarishni rejalashtirmoqda. U bunga sabab sifatida tashkilotning Amerikaga va Isroilga qarshi kayfiyatini, shuningdek, “voukizm”dan noroziligini ko‘rsatmoqda. Bu haqda The New York Post gazetasi Oq uy matbuot kotibi o‘rinbosari Anna Kellining so‘zlariga asoslanib xabar berdi.
Ta'kidlanishicha, Tramp fevral oyida AQSHning YUNESKOdagi ishtiroki bo‘yicha 90 kunlik tekshiruv o‘tkazishni buyurgan va bunda “tashkilotdagi antisemitizm yoki Isroilga qarshi kayfiyat”ni aniqlashga alohida e’tibor qaratishni topshirgan.
“Prezident Tramp amerikaliklar noyabr oyida ovoz bergan oqilona siyosatga butunlay zid bo‘lgan progressiv, kelishmovchiliklarga sabab bo‘luvchi madaniy va ijtimoiy tashabbuslarni qo‘llab-quvvatlovchi YUNESKOdan Qo‘shma Shtatlarni chiqarishga qaror qildi”, dedi Kelli.
Tekshiruv natijalariga ko‘ra, ma’muriyat vakillari YUNESKOning xilma-xillik, tenglik va inklyuzivlik siyosatiga, shuningdek, uning Falastin va Xitoyga moyilligiga e’tiroz bildirishgan.
“Xitoy YUNESKOdagi ta’siridan Pekin manfaatlariga mos keladigan jahon standartlarini ilgari surish uchun foydalandi”, dedi suhbatdosh.
YUNESKO - Birlashgan Millatlar Tashkilotining ta’lim, fan va madaniyat masalalari bo‘yicha ixtisoslashgan muassasasidir. Tashkilotning maqsadi madaniyat, fan, ta’lim va axborot texnologiyalari sohalarida xalqaro hamkorlikni rivojlantirish orqali tinchlikka ko‘maklashishdan iborat.
Izoh (0)