Filippinda bir haftadan buyon davom etayotgan tropik bo‘ron oqibatida 25 kishi halok bo‘ldi. Toshqin va ko‘chkilardan zarar ko‘rgan qishloqlardan 278 ming kishi evakuatsiya qilindi. Bu haqda Arab News xabar berdi.
Mamlakat rasmiylariga ko‘ra, 25 nafar qurbonlarning aksari toshqin, daraxt sinishi, ko‘chki va elektr toki urishi oqibatida halok bo‘lgan. Yana 8 kishi bedarak yo‘qolgani ma’lum qilingan. Orol bo‘ylab 3 mingga yaqin turar joy binolari yaroqsiz holga kelgan.
Bo‘ron Co-may deb atalib, undagi shamol tezligi 24-iyul kuni kechqurun Pangasinan provinsiyasidagi Agno shahrida soatiga 120-160 kilometrga yetgan. Shundan so‘ng, to‘fon shimoli-sharqqa siljib, uning tezligi 100 kilometr soatga tushgan. To‘fon mamlakatdagi davom etayotgan mavsumiy musson yomg‘irlarini kuchaytirib yubormoqda.
Filippin hukumati ketma-ket 3 kunga poytaxt Maniladagi maktablarni yopgan. Yana 35 ta provinsiyada ham darslar to‘xtatilgan. 77 ta shahar va qishloqlarda, asosan Luzonda, faqvqulodda holat e’lon qilingan. Bu oziq-ovqatga bo‘lgan talabni kuchaytirib yuborgan. Rasmiylar esa mahsulot narxlarini, jumladan guruch narxini muzlatib qo‘ygan.
Dengiz va havo yo‘llari orqali harakatlanish cheklab qo‘yilgan. Favqulodda qidiruv-qutqaruv ishlariga minglab armiya kuchlari, politsiya, qirg‘oq qo‘riqlash xizmati xodimlari, o‘t o‘chiruvchilar va ko‘ngillilar jalb qilingan.
Mamlakat prezidenti Kichik Ferdinand Markos 24-iyul kuni Rizal provinsiyasidagi boshpanalardan biriga tashrif buyurib, evakuatsiya qilinganlarga oziq-ovqat ulashishda qatnashgan. Keyinchalik u tabiiy ofatlarni bartaraf etish bo‘yicha mas’ullar bilan favqulodda yig‘ilish o‘tkazib, ushbu hodisalarga moslashish va qarshi choralar ko‘rish masalalarini muhokama qilgan. Manilaning uzoq yillik ittifoqchisi bo‘lgan AQSH, agar falokat kuchayib borsa, aholiga yordam yetkazib berish maqsadida harbiy samolyotlar taqdim etishini bildirdi.
Tinch okeani va Janubiy Xitoy dengizi oralig‘ida joylashgan Filippinni har yili 20 ga yaqin tayfun va bo‘ronlar qurshab oladi. Bu yerda tez-tez zilzilalar sodir bo‘ladi. Chunki orolda 20 ga yaqin faol vulqonlar mavjud.
Izoh (0)