Sankt Peterburgda mahalliy Federal xavfsizlik xizmati (FSB) shtab-kvartirasi yonida raqs tushib, suratga tushgan xorijiy sayyohlar guruhi qo‘lga olindi. Bu haqda seshanba kuni “Fontanka” nashri xabar berdi.
Xabarga ko‘ra, hibsga olinganlar orasida ikki nafar AQSH fuqarosi, bir nafar Isroil fuqarosi hamda Sankt Peterburgda yashovchi mahalliy aholi vakili bor.
Guruh shaharning Buyuk xor sinagogasidan qaytayotib FSBning Liteyniy prospektidagi binosi yaqinida to‘xtab, raqsga tushgan. Da’vo qilinishicha, ular politsiyaning suratga olishni to‘xtatish talabiga bo‘ysunmay, tajovuzkor harakatlar qilgan.
Shundan so‘ng to‘rt kishi jamoat tartibini buzishda ayblanib, vaqtinchalik hibsxonaga joylashtirilgan. Ular ustidan rasmiy ayblov qo‘yilishi haqida hozircha ma’lumot yo‘q.
Federal xavfsizlik xizmati (FSB) Rossiyaning eng qudratli tashkilotidir. Sovet KGBning merosxo‘ri hisoblangan tuzilmada, taxminan, 300 ming xodim mehnat qilishi aytiladi. Quvg‘indagi rus muxolifati va faollar tashkilotni inson huquqlarini qo‘pol ravishda buzish, cheklovlar va boshqalarda ayblab keladi. Prezident Vladimir Putinning o‘zi ham 1998-yil iyuldan 1999-yil martiga qadar FSB direktori sifatida Boris Yelsin jamoasida xizmat qilgan.
Izoh (0)