Yevropa Ittifoqi G‘azodagi insonparvarlik yordami HAMAS tomonidan to‘xtatilayotgani tasdiqlamadi. Bu haqda Yevrokomissiya vakiliga tayanib Anadolu xabar berdi.

Bryusseldagi matbuot anjumanida so‘zga chiqqan ittifoq vakili Yeva Grnchirova G‘azodagi vaziyat “halokatli” va “o‘ta og‘ir” bo‘lib qolayotganini ta’kidlagan. Unga ko‘ra, Yevropa Ittifoqining gumanitar hamkorlari sektorda ishlashni davom ettirmoqda. Grnchirova Isroilni gumanitar tashkilotlarning G‘azoga to‘siqsiz kirishini ta’minlashga chaqirgan.
“Bizda gumanitar yordamni yetkazib berish uchun ishlaydigan tizim va infratuzilma mavjud. Insonparvarlik yordami xususiylashtirilmasligi, siyosiylashtirilmasligi yoki mojaro quroli sifatida ishlatilmasligi kerak”, dedi vakil.
Shu munosabat bilan Yevropa Ittifoqi AQSH va Isroil ko‘magida tashkil etilgan G‘azo gumanitar jamg‘armasi (G‘GJ) bilan hamkorlik qilmasligini ta’kidlamoqda. Isroil esa xalqaro yordam HAMAS nazorati ostida ekanini da’vo qilib keladi. U 2-maydan buyon AQSH ishtirokida G‘GJ orqali norasmiy yordam tarqatish tizimini ilgari surmoqda. Biroq jamg‘arma BMT tomonidan tan olinmagan va falastinlik guruhlar tomonidan rad etilgan. HAMAS uni “o‘lim tuzog‘i” deb ataydi.
Isroil 2-martdan beri G‘azo sektori bilan quruqlikdagi barcha chegara punktlarini butunlay yopib qo‘ygan. Gumanitar yordam ortilgan yuzlab yuk mashinalari eksklavga kirishiga yo‘l qo‘yilmagan. Kerem Shalom chegara punkti orqali faqat bir nechta transport vositalariga ruxsat beriladi. G‘azoga esa kuniga kamida 500 ta yordam mashinasi kerak bo‘ladi.
27-maydan beri gumanitar yordam markazlariga uyushtirilgan hujumlar oqibatida halok bo‘lganlar soni 751 nafarga yetgan. Yana 4 931 kishi jarohat olgan.
Izoh (0)