O‘zbekiston hukumati Uzbekistan Airports AJ, Transport vazirligi hamda Iqtisodiyot va moliya vazirligi bilan birgalikda Urganch xalqaro aeroportini modernizatsiya qilish va boshqarish bo‘yicha davlat-xususiy sheriklik loyihasini amalga oshirishni rejalashtirmoqda. Bu haqda Transport vazirligi matbuot xizmati xabar berdi.
Urganch xalqaro aeroporti muntazam ravishda 8 ta aviakompaniyaga va Yevrosiyo bo‘ylab charter reyslari bo‘yicha 40 ga yaqin aviakompaniyaga xizmat ko‘rsatadi. 2023-yilda aeroport 590 ming yo‘lovchiga xizmat ko‘rsatgan bo‘lsa, 2024-yilda yo‘lovchi tashish hajmi 17 foizga oshishi kutilmoqda. Dastlabki prognozlarga ko‘ra, DXSH davrida yo‘lovchi tashish hajmi har yili o‘rtacha 7,5 foizga o‘sishi kutilmoqda.
O‘zbekiston hukumati tomonidan iqtisodiyotning turli tarmoqlarida, jumladan, transport infratuzilmasida davlat sektori investitsiyalari va xizmatlar ko‘rsatish mexanizmlari samaradorligini oshirishga qaratilgan islohotlar dasturi amalga oshirilmoqda.
Ushbu dastur doirasida Hukumat dunyo mamlakatlari bilan aloqani yaxshilash, shuningdek, xalqaro avia yo‘nalishlarga kirish imkoniyatini oshirish, turizm, savdo va ish o‘rinlari yaratishni rag‘batlantirish maqsadida transport infratuzilmasida DXSHni rivojlantirish niyatida.
UzAirports “Urganch xalqaro aeroportini qurish, undan foydalanish, topshirish (BOT) modelidan foydalangan holda modernizatsiya va boshqarish” loyihasini amalga oshirish bo‘yicha tenderning birinchi bosqichi (talabgorlarga dastlabki malaka hujjatlari) haqida eʼlon qildi.
UzAirports kompaniyasi PricewaterhouseCoopers (PwC) va White&Case (W&C) kompaniyalarini tanlov savdolari orqali xususiy sherik tanlashda yordam berish uchun ixtisoslashgan maslahatchilar sifatida jalb qildi.
Loyiha quyidagi modernizatsiya ishlarini o‘z ichiga oladi:
- 3500 m uzunlikdagi yangi uchish-qo‘nish yo‘lagini qurish;
- asosiy burilish yo‘lagini qurish;
- 2 bosqichli burilish yo‘laklarini qurish;
- 2 ta tutashuvchi burilish yo‘laklarini qurish;
- mavjud apronni rekonstruksiya qilish;
- yangi maʼmuriy terminal qurish;
- yangi yuk terminalini qurish;
- maxsus jihozlar binosini qurish;
- yangi umumiy ovqatlanish majmuasini qurish;
- maydoni 39 000 metr kvadrat bo‘lgan xalqaro reyslar uchun soatiga 1000 yo‘lovchiga (ham jo‘nash, ham qo‘nish) va ichki reyslar uchun soatiga 300 yo‘lovchiga (ham jo‘nash, ham kelish) xizmat ko‘rsatishga mo‘ljallangan yangi yo‘lovchi terminalini qurish.
Izoh (0)