O‘zbekiston terma jamoasi Jahon chempionati saralashining 3-bosqichini muvaffaqiyatli yakunlab, mundial yo‘llanmasini qo‘lga kiritdi. Jamoa 10 ta uchrashuv o‘tkazib, 21 ochko jamg‘ardi va A guruhida ikkinchi o‘rinni egalladi.
Saralash davomida O‘zbekiston terma jamoasi 6 ta g‘alaba, 3 ta durang qayd etdi. Yana bir o‘yinda esa imkoniyatni boy berdi. Temur Kapadze boshchiligidagi jamoa Eronga qarshi ikki o‘yinda (0:0, 2:2) hamda BAAga safardagi uchrashuvda (0:0) murosa yo‘lini tanladi. Yagona mag‘lubiyat esa Qatar terma jamoasidan qabul qilindi (2:3).
Jamoa saralash davomida raqib darvozasiga 14 ta gol urib, o‘z darvozasidan 7 ta gol o'tkazib yubordi. Abbosbek Fayzullayev 3-bosqichda 4 ta gol bilan “Oq bo‘rilar” safida to‘purar bo‘ldi. Eldor Shomurodov esa 2 ta gol muallifiga aylandi. Qolgan 8 ta golni 8 nafar futbolchi kiritdi: Hojiakbar Alijonov, Igor Sergeyev, Otabek Shukurov, Azizbek Turg‘unboyev, Jaloliddin Masharipov, Husniddin Aliqulov, Hojimat Erkinov va Oston O‘runovning har biri bittadan gol urishga muvaffaq bo‘ldi.
O‘zbekiston terma jamoasi o‘z uyida o‘tkazgan barcha uchrashuvlarda o‘z darvozasini dahlsiz saqladi. Jamoa “Bunyodkor” stadionida o‘tgan 5 ta o‘yinda maydonga tushib, barchasida o‘z darvozasidan gol o‘tkazib yubormadi.
O‘zbekiston — KXDR 1:0
O‘zbekiston — Eron 0:0
O‘zbekiston — BAA 1:0
O‘zbekiston — Qirg‘iz Respublikasi 1:0
O‘zbekiston — Qatar 3:0
Saralash davomida O‘zbekiston darvozasiga faqat uch terma jamoa gol urishga muvaffaq bo‘ldi — Eron, Qatar va Qirg‘iziston. Bishkekdagi bahs 3:2 hisobida O‘zbekiston foydasiga yakunlandi, Tehronda esa Eron bilan 2:2 durang qayd etildi. Dohadagi Qatarga qarshi o‘yinda esa 2:3 hisobida imkoniyat boy berildi.
Izoh (0)