O‘zbekiston terma jamoasi sardori va Rimning “Roma” klubi hujumchisi Eldor Shomurodov Istanbulning “Bashakshehir” klubi bilan shartnoma imzolash uchun Turkiyaga yetib bordi. Bu haqda jurnalist Yakub Chinor o‘zining X (sobiq Twitter) sahifasida ma’lum qildi.
Manbaga ko‘ra, Shomurodov ayni paytda Istanbulda bo‘lib turibdi. U klub bilan har tomonlama kelishuvga erishgan, yaqin kunlarda rasmiy shartnoma imzolanishi kutilmoqda.
Avvalroq Turkiyaning Gazetaarena nashri “Bashakshehir” Eldorga jiddiy qiziqish bildirayotgani borasida xabar tarqatgan edi.
Rim klubi futbolchining ketishiga qarshilik bildirmayapti. Chunki Shomurodovning “Roma” bilan shartnomasi 2026-yilning yozida yakunlanadi. Shu bois klub uni erkin agent sifatida jamoadan ketishini istamay, uni transferga qo‘ygan.
“Bashakshehir” ushbu mavsum jamoani kuchaytirishni maqsad qilgan. Transfermarkt nashriga ko‘ra, klub nafaqat Shomurodov, balki o‘zbekistonlik boshqa futbolchi — Abbosbek Fayzullayev uchun ham taklif bilan chiqqan. Shuningdek, Istanbul klubi “Qosimposhsho”dan Nunu da Kostani ham o‘z safiga qo‘shib olmoqchi.
Izoh (0)