Buxoro viloyati Jondor tumanida erkak O‘zbekiston Qizil kitobiga kiritilgan bo‘z echkiemar og‘ziga nos solib, shafqatsiz munosabatda bo‘ldi. Bosh prokuratura holat yuzasidan ma’lumot berdi.
Unga ko‘ra, mazkur holat yuzasidan Buxoro viloyati prokuraturasi, Ichki ishlar hamda Ekologiya, atrof-muhitni muhofaza qilish va iqlim o‘zgarishi boshqarmasi xodimlaridan iborat ishchi guruh tuzilib, tezkor o‘rganish ishlari amalga oshirildi.
Aniqlanishicha, joriy yil 1-iyun kuni Jondor tumani “Yosh kuch” mahallasida yashovchi fuqaro G‘.G‘. cho‘l hududidagi dala shiyponiga tasodifan kirib qolgan bo‘z echkiemarni ushlab, uning og‘ziga tamaki mahsulotini solgan va keyinchalik yaylovga qo‘yib yuborgan.
Ushbu holat yuzasidan tegishli hujjatlar rasmiylashtirilib, hozirda ichki ishlar organlari tomonidan tergovga qadar tekshiruv harakatlari o‘tkazilmoqda.
Tekshiruv harakatlari prokuratura tomonidan nazoratga olingan.
Amaldagi qonunchilikka muvofiq, hayvonlarga, xususan muhofaza ostidagi turlarga nisbatan shafqatsiz muomala qilish uchun ma’muriy va jinoiy javobgarlik belgilangan. Bunday xatti-harakatlar nafaqat axloqqa zid, balki tabiiy muhit va biologik xilma-xillikka tahdid soluvchi jiddiy huquqbuzarlik hisoblanadi.
Qayd etilishicha, prokuratura organlari tomonidan mutasaddi idoralar bilan hamkorlikda ekologik qonunchilik ijrosini ta’minlash, bunday holatlarning oldini olish va jamiyatda mas’uliyat hissini oshirishga qaratilgan tizimli chora-tadbirlar izchil davom ettiriladi.
Bundan avval Surxondaryoda ikki yigit toshbaqaga nos chektirgan edi. Holat yuzasidan ikki nafar fuqaroning har biriga nisbatan Ma’muriy javobgarlik to‘g‘risidagi kodeksning 111-moddasiga asosan BHMning 3 barobari — 1 million 20 ming so‘m miqdorida jarima belgilandi.
Echkiemar og‘ziga nos solinsa nima bo‘ladi?
Echkiemar kabi sudralib yuruvchilarning organizmi nosdagi moddalarni qabul qilishga moslashmagan, shuning uchun bu ularning sog‘lig‘i uchun xavfli bo‘lishi mumkin. Juda kichik tana tuzilmasi tufayli nosdagi zaharli moddalar (xususan nikotin) tezda butun tanaga tarqaladi. Bu ko‘pincha o‘lim bilan yakunlanadi.
Izoh (0)