Ikkinchi eng yengil vazn toifasida WBA Interim kamari sohibi, o‘zbekistonlik Murodjon Ahmadaliyev (14-1, 11 KO) va super yengil vazn toifasining mutlaq chempioni, yaponiyalik Naoya Inoue (30-0, 27 KO) o‘rtasidagi jang rasman tasdiqlandi. Ahmadaliyev o‘zining Instagram sahifasida xabar berishicha, ushbu qiziqarli to‘qnashuv 14-sentyabr kuni Yaponiyaning Tokio shahrida bo‘lib o‘tadi.
Ahmadaliyev va Inoue o‘rtasidagi ehtimoliy jang uzoq vaqtdan beri muhokama qilinib kelayotgan edi. Murodjon bir nechta janglardan so‘ng o‘tkazilgan matbuot anjumanlarida Inoueni jangga chorlab kelayotgan, biroq yaponiyalik chempion bunga rozilik bermayotgan edi. WBA tashkiloti esa agar Inoue yana jangdan bosh tortsa, undan chempionlik kamarini olib qo‘yishi mumkinligi haqida ogohlantirdi.
Nihoyat, Ahmadaliyevning promouteri Eddi Xirn va menejeri Vadim Kornilov Inouening promouterlari bilan kelishuvga erishib, Tokioda o‘tkaziladigan jang bo‘yicha shartnoma imzolashdi.
Ma’lumot o‘rnida, Naoya Inoue 4-may kuni Las-Vegasda Ramon Kardenasni mag‘lub etgan bo‘lsa, Murodjon Ahmadaliyev 31-may kuni Meksikaning Gvadalaxara shahrida Luis Kastilyo ustidan g‘alaba qozondi.
Izoh (0)