Toshkent tumanlararo iqtisodiy sudida Octobank da’vo arizasi bo‘yicha Humans’dan 500 milliard so‘mdan ortiq qarzdorlikni undirish va yetkazilgan zararni qoplash to‘g‘risidagi iqtisodiy ish ko‘rib chiqilmoqda. Bu haqda bank matbuot xizmati xabar berdi.
Ma’lum qilinishicha, Octobank Humans bilan o‘zaro hisob-kitoblarga xizmat ko‘rsatish va Humans moliyaviy xizmati doirasida chiqarilgan kartalar bo‘yicha operatsiyalarni amalga oshirish 2025-yil 13-iyun kuni soat 18:00 dan boshlab to‘xtatadi.
Bunday qaror Humans tomonidan shartnomaviy munosabatlarning muntazam ravishda buzilishi va qabul qilingan majburiyatlarning bajarilmasligi sababli qabul qilingan. 2020-yildan beri tomonlar o‘rtasida moliyaviy xizmatni birgalikda amalga oshirish bo‘yicha kelishuv amal qilib kelgan bo‘lib, unda Octobank hamkor sifatida ishtirok etgan. Bank shartnoma shartlarini lozim darajada bajarib kelgan bo‘lsa-da, Humans tomonidan amalga oshirilgan kliring operatsiyalari bo‘yicha qarzdorlik va ko‘rsatilgan xizmatlar uchun komissiya qoplanmasdan kelmoqda.
Octobank Humans kobrend kartalaridagi pul mablag‘lari Humans moliyaviy servisidagi abonentlarning shaxsiy hisobvarag‘iga o‘tkazilgani sababli ushbu mablag‘larning hisobi va qoldig‘i Humans’ning hisobvaraqlarida yuritilishini hamda pul mablag‘larini qaytarish zarurati tug‘ilganda, Humans’ga murojaat qilish lozimligini bildirdi.
“O‘zbektelekom” ham Humans katta miqdorda qarzdorlikni to‘lamasdan kelganini ma’lum qilgandi. Shu munosabat bilan mavjud qarzdorlikni undirish va kelgusida kompaniyaga zararni kamaytirish maqsadida tegishli sudga daʼvo arizasi kiritilgan. “O‘zbektelekom” AK tomonidan ko‘rsatilgan xizmatlar uchun qarzdorlik yuzasidan 8-may kuni Humans kompaniyasiga nisbatan Toshkent shahar iqtisodiy sudi qarori chiqarilgan.
Izoh (0)