Qashqadaryo viloyati Ko‘kdala tumanida haydovchi YPX xodimini pichoqlab o‘ldirdi. Bu haqda viloyat prokuraturasi xabar berdi.
Ma’lum qilinishicha, 8-iyul kuni soat 19:00 larda Ko‘kdala tuman Ichki ishlar boshqarmasi jamoat xavfsizligi xizmati YHXB katta inspektori E.P. tomonidan haydovchi S.B. boshqaruvidagi avtomashina to‘xtatilib, tekshirilgan.
Shu vaqt haydovchi qonuniy talablarga bo‘ysunmasdan, faol qarshilik ko‘rsatib, katta inspektorning qorin sohasiga o‘tkir tig‘li jism bilan tan jarohati yetkazib, hodisa joyidan yashiringan. Ko‘rsatilgan tibbiy yordamga qaramasdan katta inspektor Respublika shoshilinch tez-tibbiy yordam ilmiy markazi Qashqadaryo filialida vafot etgan.
Holat yuzasidan 9-iyulda Ko‘kdala tuman prokuraturasi tomonidan fuqaro B.S.ga nisbatan Jinoyat kodeksining 219-moddasi 2-qismi va 97-moddasi 2-qismi “g” bandi bilan jinoyat ishi qo‘zg‘atilgan.
Gumonlanuvchi shaxs protsessual tartibda ushlangan. Jinoyat ishi bo‘yicha dastlabki tergov harakatlari Ko‘kdala tuman prokuraturasi tomonidan olib borilmoqda.
Bundan bir necha oy avval Qashqadaryo viloyati Kitob tumanida Damas YPX xodimini bosib ketgan edi. Holat yuzasidan Kitob tumani prokuraturasi tomonidan tergovga qadar tekshiruv harakatlari olib borilmoqda.
Izoh (0)