Londonning “Chelsi” klubi Klublar o‘rtasidagi Jahon chempionati yarim finalida Braziliyaning “Fluminense” jamoasini 2:0 hisobida mag‘lub etib, musobaqaning final bosqichiga yo‘l oldi. Shu bilan birga, klub moliyaviy jihatdan ham katta foyda ko‘rdi — “ko‘klar” hozirgacha 110 million dollar daromad olgan. Bu haqda amerikalik jurnalist Ben Jeykobs o‘zining ijtimoiy tarmoqdagi sahifasida xabar berdi.
Manbaga ko‘ra, agar “Chelsi” finalda ham g‘alaba qozonsa, umumiy daromadi 120 million dollarga yetadi. Bonuslar hisobga olinganda, musobaqada bir jamoaning maksimal daromadi 125 million dollarga yetishi mumkin.
Ma’lumot uchun, “Chelsi” ushbu turnir finaliga uchinchi bor yo‘l olmoqda. London klubi ilk bor 2012-yilda musobaqaning hal qiluvchi bosqichida ishtirok etgan va Braziliyaning “Korintians” klubiga 0:1 hisobida mag‘lub bo‘lgan edi. 2021-yilda esa ikkinchi bor finalda qatnashib, “Palmeyras” ustidan 2:1 hisobida g‘alaba qozongan.
Eslatib o‘tamiz, “Chelsi” finalda 9-iyuldan 10-iyulga o‘tar kechasi bo‘lib o‘tadigan “PSJ” – “Real Madrid” juftligining g‘olibi bilan kuch sinashadi. Uchrashuv Toshkent vaqti bilan soat 00:00 da boshlanadi.
Izoh (0)