Qurilish materiallari sanoatida ilm-fan yutuqlarini keng joriy qilinishi tarmoqda qo‘shimcha qiymatga ega, import o‘rnini bosuvchi, eksportbop mahsulotlar ishlab chiqarish hajmining ortishida muhim ahamiyat kasb etmoqda. Davlatimiz rahbarining sohani ilm asosida rivojlantirish bo‘yicha topshiriqlari bu borada muhim dasturilamal bo‘lib xizmat qilmoqda.
Joriy yilning 15-iyun kuni mazkur yo‘nalishdagi ishlarni yangi bosqichga olib chiqishga xizmat qiladigan navbatdagi loyiha –“O‘zsanoatqurilishmateriallari” uyushmasi qoshida O‘zsanoatqurilishbank bilan hamkorlikda “R&D tadqiqotlar markazi” ochilish marosimi bo‘lib o‘tdi.
Tadbirda “O‘zsanoatqurilishmateriallari” uyushmasi, Savdo-sanoat palatasi, O‘zsanoatqurilishbank masʼullari, olimlar, tadqiqotchilar va ommaviy axborot vositalari xodimlari ishtirok etdi.
Taʼkidlanganidek, tadqiqotlar markazini tashkil etishdan asosiy maqsad – ishlab chiqarish korxonalari hamda soha olimlarini bir – biriga yanada yaqinlashtirish, oliy taʼlim muassasalari va ilmiy-tadqiqot institutlarining asoslangan tadqiqot natijalarini amaliyotga tadbiq etish alohida eʼtibor qaratish, shuningdek, “Innovatsion aktiv korxona”lar yaratishdan iborat.
Ushbu jarayonda “R&D tadqiqotlar markazi” tayyor, ilmiy asoslangan loyihalarni shakllantirish hamda ularni tijoratlashtirish natijasida sohaning “tadqiqot ehtiyoji” hamda olimlarning “tadqiqot yo‘nalishlari”ni o‘zaro uzviylashtirib boradi.
“R&D tadqiqotlar markazi”ga jalb etilgan mutaxassislar tijoratlashtirishga tayyor ilmiy asoslangan loyihalarini tadbirkorlik subyektlari uchun jozibador ko‘rinishga keltiradi.
Shuningdek, The higher education, Quacquarelli symonds, Springer singari ilmiy reyting beruvchi yirik agentliklar tavsiyalari asosida olim va izlanuvchilarning tadqiqotlari natijalarini butun dunyoga eʼlon qilishga amaliy yordam beradi.
Markaz doimiy tarzda sohaning asosiy tadqiqot yo‘nalishlarini aniqlash yuzasidan tahlillar o‘tkazadi va takliflar ishlab chiqadi.
– Markaz oliy taʼlim muassasalari va ilmiy-tadqiqot institutlari bilan ishlab chiqarish korxonalari o‘rtasida “ko‘prik“ bo‘lib xizmat qiladi, – deydi “O‘zsanoatqurilishmateriallari” uyushmasi boshqaruv raisining maslahtchisi Bahodir Ismoilov. – Shuningdek, bu yerda yangi mahsulot turlarini o‘zlashtirish, texnologiyalar transferi va ularni mahalliy sharoitda qo‘llashning samaradorligi o‘rganish, energiya tejamkorlik, qayta tiklanuvchi energiya manbalari, qattiq maishiy chiqindilar utilizatsiyasi hamda iqtisodiy samaradorlikka erishish bo‘yicha soha manfaatlariga mos keluvchi asoslangan takliflar ishlab chiqish bilan shug‘ullanadi.
Bundan tashqari, markaz mutaxassislari tomonidan marketing tadqiqotlari, tajriba-konstruktorlik va novatorlik ishlanmalarini soha korxonalarga taqdim etadilar.
Tadbir doirasida, shuningdek, olim va tadqiqotchilarning sohani yanada rivojlantirish yuzasidan fikr-mulohazalari tinglanib, ularni amalga tatbiq etish chora-tadbirlari muhokama qilindi. Uyushma huzurida tashkil etilgan laboratoriya imkoniyatlari va qurilish materiallari “shou-rumi” bilan tanishildi.
Reklama huquqi asosida.
Izoh (0)