“Boxo zavxoz” va “Terminator” laqablari bilan tanilgan Bahodir Sultonov hamda u bilan bir ish doirasida qamoqqa olingan “Navoiy avtosavdo” MCHJ ta’sischisi Niyoz Ibodovga 16-may kuni jinoyat ishlari bo‘yicha Olmazor tuman sudida sud hukmi o‘qildi. Bu haqda Toshkent shahar sudlari matbuot xizmati “Daryo”ga ma’lum qildi.
Qayd etilishicha, Bahodir Sultonov hamda Niyoz Ibodov Jinoyat kodeksining 165-moddasi 3-qismi “a” (juda ko‘p miqdorda tovlamachilik) bandida nazarda tutilgan jinoyatni sodir etganlikda aybli deb topilgan.
Sud hukmi bilan Bahodir Sultonovga 10 yil muddatga ozodlikdan mahrum etish jazosi tayinlangan. Shuningdek, sud hukmi bilan Bahodir Sultonov o‘ta xavfli retsidivist deb topilgan.
Niyoz Ibodovga esa 4 yil muddatga ozodlikdan mahrum qilish jazosi tayinlangan.
20 mlrd so‘mlik tahdid
Niyoz Ibodov “Navoiy avtosavdo” MCHJda 61,20 foiz ulushga egalik qilgan. MCHJning 32,70 foiz ulushi esa Sardor G‘afforovga tegishli bo‘lgan.
Aytilishicha, Niyoz Ibodov o‘zining jiyani bo‘lgan Sardor G‘afforovni “Navoiy avtosavdo” MCHJdagi ulushidan voz kechtirish bo‘yicha Bahodir Sultonovga murojaat qilgan. Sultonov, Niyoz Ibodov va boshqa noma’lum shaxslar 2023-yilning iyun oyi boshlarida bir guruhga birlashib, ishni “hal qilish” uchun oldindan jinoiy til biriktirgan.
Guruh a’zolari Toshkent shahri Olmazor tumanida joylashgan ofisga Sardor G‘afforovni chaqirib, undan avtosalondagi 20 milliard so‘mga teng ulushini 200 ming AQSH dollari evaziga Niyoz Ibodov nomiga o‘tkazib berish haqida do‘q-po‘pisa qilib, agar ulushni o‘tkazib bermasa, jismonan yo‘q qilib yuborishni aytishgan.
Izoh (0)