Qozog‘istonning Aqto‘be shahri yaqinidagi Sazdi suv omborida yuzaga kelgan vaziyat tufayli aholi evakuatsiya qilinmoqda. Bu haqda Qozog‘iston telegraf agentligi xabar berdi.
Ma’lum qilinishicha, Sazdi suv omborida suv oqimi ko‘paygan va bu Sazdi hamda Jinishka daryolarida suv sathining ko‘tarilishiga olib kelishi mumkin.
Favqulodda vaziyatlar boshqarmasi qutqaruvchilari yaqin atrofdagi qishloqlardan fuqarolarni oldindan evakuatsiya qilmoqda. Ayni paytda 25 kishi evakuatsiya qilingan, ulardan to‘qqiz nafari bolalar, — deyiladi Favqulodda vaziyatlar vazirligi xabarida.
Sazdi suv ombori Aqto‘bedan 8 kilometr uzoqlikda joylashgan. Uralsk shahrida ham 2-apreldan beri Derko‘l va Shagan daryolarida suvning kritik darajadan ko‘tarilishi sababli ayrim turar joy va qishloq uylarini suv bosgan. Aholi evakuatsiya qilinmoqda, qutqaruvchilar vahima qilmaslikni so‘ragan.
Uylari Shagan va Derko‘l daryolari tekisliklarida joylashgan 10 mingdan ortiq aholi vaqtincha xavfsiz joylarga ko‘chib o‘tmoqda. Vaqtinchalik uy-joyi bo‘lmagan odamlar evakuatsiya markazlariga joylashtiriladi. Aholini evakuatsiya qilish uchun jami 12 ta avtobus ajratilgan. Talonchilikning oldini olish maqsadida suv bosgan hududlarda politsiya xodimlari kecha-yu kunduz navbatchilik qilmoqda.
Izoh (0)