Qurilish va uy-joy kommunal xo‘jaligi vazirligi tomonidan OAV vakillari hamkorligida reyd tadbirlari tashkil etildi. Bu haqda vazirlik matbuot xizmati xabar berdi.
Reyd davomida Chilonzor tumani Cho‘ponota ko‘chasi 14-uy manzilida Leader House Building MCHJ tomonidan qurilayotgan obyekt o‘rganilgan. Mavjud savdo do‘koni binosini yerto‘la qismida avtoturargoh tashkil qilish sharti bilan 1-2-qavatlari savdo va maishiy xizmat ko‘rsatish majmuasi bo‘lgan o‘rta qavatli turar joy binosiga qayta ixtisoslashtirib, rekonstruksiya qilish obyektining qurilish-montaj ishlari Toshkent shahar Qurilish va uy-joy kommunal xo‘jaligi sohasida hududiy nazorat qilish inspeksiyasidan tegishli tartibda ro‘yxatdan o‘tmasdan turib amalga oshirilgan.
Ma’muriy javobgarlik to‘g‘risidagi kodeksning 99-moddasi (shaharsozlik to‘g‘risidagi qonunchilikni buzish) 7-qismida nazarda tutilgan qonun buzilish holati aniqlanganidan kelib chiqib, hududiy nazorat qilish inspeksiyasi tomonidan qurilish ishlariga mas’ul rahbar o‘rinbosariga nisbatan Vazirlar Mahkamasi qarori bilan belgilangan talab asosida yozma ko‘rsatma rasmiylashtirilgan hamda ko‘rsatma talablarini o‘z vaqtida bajarmagani uchun 2022-yil 3-noyabrda maʼmuriy jazo qo‘llanilgan.
Shunga qaramay Leader House Building MCHJ tomonidan yana qurilish ishlari olib borilayotgani aniqlangan hamda inspeksiya tomonidan 2022-yilning 2-fevralida 309-sonli yozma ko‘rsatma rasmiylashtirilgan. Ko‘rsatma talablarini o‘z vaqtida bajarmagani uchun 2023-yil 30-martda MCHJ rahbar o‘rinbosariga nisbatan maʼmuriy jazo qo‘llanilgan.
Vazirlar Mahkamasi qarori 1-ilovasi “Obyektlarni qurish, rekonstruksiya qilish, mukammal va joriy taʼmirlash bo‘yicha shaharsozlik va loyiha hujjatlarining loyihaviy yechimlarini shaharsozlik hujjatlariga muvofiqligi yuzasidan ekspertizadan o‘tkazish tartibi to‘g‘risida”gi nizomning 5-bandiga ko‘ra, shaharsozlik hujjatlari loyihalarining texnik qismi, yaʼni bino-inshootning zilzilabardoshligi hamda energiya samaradorlik ko‘rsatkichlari, yong‘in xavfsizligi talablari yuzasidan majburiy ekspertizadan o‘tkazilishi lozim bo‘lsa-da, City Stroy Project MCHJ tomonidan ishlab chiqilgan ishchi loyiha hujjatlari ekspertiza ko‘rigidan o‘tkazilmagan.
Toshkent shahar Qurilish va uy-joy kommunal xo‘jaligi sohasida hududiy nazorat qilish inspeksiyasi tomonidan qo‘yilgan talablarni bajarmasdan SHNQ va QMQ talablarini qo‘pol ravishda buzgan holda Toshkent shahri Chilonzor tumani Cho‘ponota ko‘chasi 14-uy manzilida qurilish-montaj ishlarini davom ettirayotgan Leader House Building MCHJ mas’ul rahbarlariga nisbatan Toshkent tumanlararo Iqtisodiy sudiga daʼvo arizasi kiritilgan.
Avvalroq Navoiyda fuqaro “dom”ga o‘zi uchun alohida lift o‘rnatayotgani aniqlangandi. Mulkdorga ko‘p kvartirali uyning umumiy mulkidan foydalanish qoidalari, bunda aholi oldiga qo‘yiladigan talablar tushuntirilgan va o‘zboshimchalik bilan qurilgan qurilmani bartaraf etish bo‘yicha tegishli tartibda majburiy ko‘rsatma berilgan.
Izoh (0)