Islandiya hukumati mamlakat janubi-g‘arbida vulqon otilishi xavfi tufayli favqulodda holat e’lon qildi, deb xabar berdi Britaniya telekanali Sky News.
Reykyanes yarimorolidagi Grindavik shahri aholisini “ehtiyotkorlik yuzasidan” evakuatsiya qilishga chaqirildi.
![](/static/2023/vulqon88.jpg)
Sky News xabar berishicha, ehtimoliy xavflar tufayli Islandiya hukumati sayyohlar orasida mashhur bo‘lgan Blue Lagoon geotermal kurortini ham yopdi. Islandiya meteorologiya idorasi (IMO) seysmik faollikdagi “sezilarli o‘zgarishlar”ni qayd etdi.
Bir kun avval Reykyanes yarimorolida 800 ga yaqin, oktyabr oyi oxiridan beri esa jami 24 mingdan ortiq yer silkinishlari qayd etilgan. IMO maʼlumotlariga ko‘ra, so‘nggi bir necha hafta ichida yer sathi 9 sm ga ko‘tarilgan.
800 yillik harakatsizlikdan keyin birinchi marta Islandiya yarimorolida vulqon tizimining otilishi 2021-yilning mart oyida kuzatilgandi. O‘shandan beri yana ikkita marta vulqon otilishi sodir bo‘ldi: 2022-yil avgustida va 2023-yil iyulida. Ushbu vulqon otilishlarida hech kim jabrlanmagan.