O‘zbekistonda 1-sentabrdan xorijiy tilni bilgan tibbiyot oliygohi talabasiga BHMning 3 barobari miqdorida stipendiya to‘lanadi. Bu haqda SSV axborot xizmati xabar berdi.
Unga ko‘ra, 2023/2024-o‘quv yilidan tibbiyot oliy ta’lim muassasalari hamda Abu Ali bin Sino nomidagi jamoat salomatligi texnikumlarida tahsil oluvchi, xorijiy tillarni yaxshi o‘zlashtirgan talabalar rag‘batlantirib boriladi. Bu haqda sog‘liqni saqlash vazirining 2023-yil 11-avgustdagi tegishli buyrug‘i qabul qilindi.
Tibbiyot oliy ta’lim muassasalari hamda Abu Ali bin Sino nomidagi jamoat salomatligi texnikumlarida ta’lim oluvchi, kamida 7,5 ingliz tilini bilish darajasini belgilovchi xalqaro tan olingan sertifikatga (IELTS Academic) hamda nemis va fransuz tilini bilish darajasini belgilovchi C1 xalqaro tan olingan sertifikatga ega bo‘lgan talabalarga 2023-yil 1-sentabrdan boshlab, ularning sertifikati amal qilish davrida bazaviy hisoblash miqdorining uch barobari miqdorida har oylik stipendiya to‘lab borish tartibi joriy etiladi.
Mazkur stipendiya prezidentning 2020-yil 7-apreldagi qarorining 4-bandida nazarda tutilgan tibbiyot oliy ta’lim muassasalari talabalariga beriladigan to‘lovga qo‘shimcha ravishda beriladi. Buning uchun tibbiyot oliy ta’lim muassasalari rektorlari hamda Abu Ali ibn Sino nomidagi jamoat salomatligi texnikumlari direktorlari tomonidan har chorakda ushbu stipendiyani olishga talabgor bo‘lgan nomzodlar to‘g‘risidagi qo‘shimcha ma’lumotlar vazirlikning Ilm-fan va ta’lim boshqarmasiga kiritib borishi belgilangan.
Izoh (1)
undan ko'ra stipendiya deyarli berilmaydi deb qo'ya qol;ishmaydimi. Axir tibbiyot talabasi o'z fanlarini chuqur o'zlashtirsinmi yoki ingliz tili o'qisinmi, 7,5 ieltsni hamma ishini qo'yib 2 yil faqat ingliz tili o'qiganlar zo'rg'a olyaptiku. Undan keyin 7,5 ieltsi bor talaba yoki abiturientni hali ko'rmadim uzbda o'qiyman deganini, ayniqsa tibbiyot bo'lsa. Mantiqan o'ylab ko'rilsa bo'lmaydimi, 6,5 desa ham mayli edi.