Oliy Majlis Qonunchilik palatasi deputatlari kontrafakt va sifatsiz mahsulotlar muomalasining oldini olishga qaratilgan qonun loyihasini ma’qulladi. Bu haqda parlament quyi palatasi matbuot xizmati xabar berdi.
Mazkur qonun loyihasi bilan inson hayoti yoki sog‘lig‘i xavfsizligi talablariga javob bermaydigan tovarlarni ishlab chiqarganlik va muomalaga kiritganlik uchun jazo choralari yanada kuchaytirilishi taklif etilmoqda. Xususan, inson sog‘lig‘i va hayotiga xavf soluvchi tovarlarni ishlab chiqarish va sotganlik uchun uchun jazo choralari yanada kuchaytirilyapti.
“Etil spirti, alkogol va tamaki mahsulotlarini qonunga xilof ravishda ishlab chiqarganlik to‘g‘ridan to‘g‘ri jinoiy javobgarlikka sabab bo‘lishi nazarda tutilmoqda”, — deyiladi xabarda.
Shuningdek, ishlab chiqarish va xizmat ko‘rsatish obyektlari tomonidan sanitariya normalari va gigiyena qoidalariga rioya etilmaslik inson sog‘lig‘iga ta’sir ko‘rsatishga sabab bo‘lishi mumkin. Mazkur qonun loyihasida sanitariya va veterinariya qonunchiligini buzish bilan bog‘liq huquqbuzarliklar uchun jazo chorasi og‘irlashtirilyapti.
Bundan tashqari, tadbirkorning tovar brendidan noqonuniy foydalangan holda, mahsulot ishlab chiqarib, realizatsiya qilganlik uchun ma’muriy javobgarlik kuchaytirilib, tadbirkorlik subyektlarida o‘tkaziladigan tekshirishlar tartibi aniq belgilab berilmoqda.
Deputatlarning qayd etishicha, qonun loyihasining qabul qilinishi iste’molchilar huquqlarini himoya qilish, kontrafakt va iste’molga yaroqsiz mahsulotlarning muomalasiga chek qo‘yish hamda ishlab chiqaruvchilar manfaatlarini, iste’molchilar huquqlarini himoya qilish, aholi salomatligini ta’minlashga xizmat qiladi.
Majlisda deputatlar tomonidan bir qator taklif va tavsiyalar bildirilib, qonun loyihasi qabul qilingan.
Kontrafakt mahsulotlar
Farg‘ona viloyatida joylashgan “Qortuz” korxonasi Toshkent shahridagi “Orzu” savdo belgisi ostida chiqayotgan iste’mol tuzi dizaynini takrorlagani ma’lum bo‘lgandi. Shuningdek, The Procter & Gamble Company kompaniyasiga tegishli bo‘lgan Tide tovar belgisi (brendi) ga o‘xshash bo‘lgan “Тиде” nomli kontrafakt kir yuvish kukunlari sotilayotgani aniqlangan edi.
Izoh (0)